უკრაინის პრეზიდენტის, ვოლოდიმირ ზელენსკის განცხადებით, რუსეთის ტერიტორიაზე ამჟამად ჩრდილოეთ კორეის 8 ათასზე მეტი სამხედრო მოსამსახურე იმყოფება, კიდევ დაახლოებით 10 ათასის მომზადება მიმდინარეობს, რის შემდეგაც მათი რუსეთში გადასროლა იგეგმება.
ზელენსკის თქმით, ამის შესახებ უკრაინის თავდაცვის სამინისტროს მთავარი სადაზვერვო სამმართველოს ანგარიშშია აღნიშნული.
„გვაქვს ახალი მონაცემებიც რუსეთში ჩრდილოეთ კორეის სამხედრო მოსამსახურეების ჩართულობის შესახებ: ამჟამად რუსეთის ტერიტორიაზე ჩრდილოეთ კორეის 8 ათასზე მეტი სამხედრო იმყოფება. მზადება მიმდინარეობს დამატებით 10 000 სამხედროს განლაგებისთვის. მათ არჩევენ მომზადების გასავლელად და შემდგომ რუსეთში გადასასროლად“, - განაცხადა ზელენსკიმ ვიდეომიმართვაში.
უკრაინის პრეზიდენტის განცხადებით, რუსეთმა უკვე დაიწყო დამატებითი მობილიზაცია და სხვადასხვა მეთოდით არმიაში ჩასართავი ადამიანების რაოდენობას ზრდის.
„გეგმავენ უცხოელების ჩართულობის გაზრდასაც. მნიშვნელოვანია, რომ იმ ქვეყნების მთავრობებმა, საიდანაც რუსეთი ადამიანებს საკუთარ არმიაში იზიდავს, ამას წინააღმდეგობა გაუწიონ. თითოეულ მთავრობას ამის შესახებ ინფორმაციას მივაწვდით“, - აღნიშნა ზელენსკიმ.
მისივე თქმით, რუსეთი ჩრდილოეთ კორეას სამხედრო დახმარებისთვის, მათ შორის, ტექნოლოგიებით უხდის.
ზელენსკის განცხადებით, რუსეთის ტექნიკური მხარდაჭერით ჩრდილოეთ კორეაში უკვე განთავსდა „შაჰედის“ ტიპის დამრტყმელი დრონების წარმოება.
