უკრაინის პრეზიდენტი ვოლოდიმირ ზელენსკი რუსეთის მიერ კიევში, უკრაინის მეცნიერებათა ეროვნული აკადემიის შენობაზე დარტყმას ეხმიანება.
როგორც ზელენსკი სოციალურ ქსელში წერს, რუსეთი პასუხს აუცილებლად მიიღებს.
"რუსეთის მიერ უკრაინის მეცნიერებათა ეროვნული აკადემიის შენობაზე განხორციელებული დარტყმა. ამჟამად სამაშველო ოპერაცია მიმდინარეობს: ეკიპაჟები ხანძარს აქრობენ და ეძებენ ადამიანებს, რომლებიც შესაძლოა შენობაში იყვნენ მოყოლილი. ყველა შესაბამისი სამსახური ადგილზეა მობილიზებული.
დღეს კიევში ასევე განხორციელდა თავდასხმა ფარმაცევტულ კომპანიასა და ბენზინგასამართ სადგურებზე; დნიპროში - ბიზნესცენტრზე, ხოლო სხვა ქალაქებსა და რეგიონებში სამიზნე იყო სამოქალაქო ობიექტები, საწარმოები და საკომუნიკაციო ინფრასტრუქტურა.
სამწუხაროდ, არიან დაღუპულები... ვუსამძიმრებ მათ ოჯახებსა და ახლობლებს.
რუსეთი პასუხს აუცილებლად მიიღებს, უკრაინის ყველა პარტნიორმა ამ ტერორისა და ამ დარტყმების მაგალითზე უნდა დაინახოს, რომ უკრაინის მხარდაჭერა ნიშნავს ადამიანების სიცოცხლის რეალურ მხარდაჭერას - იმ პრინციპის მხარდაჭერას, რომ ტერორი არასოდეს, არსად არ უნდა გახდეს ნორმა.
რუსეთმა ამ ყველაფერზე პასუხი უნდა აგოს და რეალური შედეგები უნდა მოჰყვეს.
მადლობა ყველას, ვინც უკრაინას ეხმარება!" - წერს ზელენსკი.
