უკრაინის პრეზიდენტი ვოლოდიმირ ზელენსკი მიიჩნევს, რომ დეკემბერში მაიამიში დაგეგმილი „დიდი ოცეულის“ (G20) სამიტი ტრამპსა და პუტინთან სამმხრივი შეხვედრისთვის ერთ-ერთი საუკეთესო შესაძლებლობაა
„ვფიქრობ, ეს არის ამერიკული მხარის, პრეზიდენტ ტრამპის მიერ G20-ის ფარგლებში შემოთავაზებული ერთ-ერთი საუკეთესო შესაძლებლობა. მგონი, ეს 12 დეკემბერია. ვფიქრობ, ეს არის პოტენციური შესაძლებლობა სამმხრივი შეხვედრისთვის, რომელსაც რეალური შედეგის მოტანა შეუძლია“, - განაცხადა ზელენსკიმ გაერო-ს გენერალურ ასამბლეაზე გამოსვლის შემდეგ ჟურნალისტებთან საუბრისას.
მისი თქმით, უკრაინამ ამერიკულ მხარესთან უკვე განიხილა ასეთი ფორმატის შესაძლებლობა და შეხვედრაში მონაწილეობის მზადყოფნა.
ზელენსკის განცხადებით, მნიშვნელოვანი ფაქტორია აშშ-ის პრეზიდენტ დონალდ ტრამპის მონაწილეობა და G20-ის ფარგლებში სხვადასხვა ქვეყნის ფართო წარმომადგენლობა.
„ეს ნიშნავს, რომ საუბარი მხოლოდ ევროპაზე არ არის, რომელიც პუტინს მოსწონს ან აღიზიანებს... აქ მნიშვნელოვანია ჩვენი ევროპელი პარტნიორების მონაწილეობა, ასევე ახლო აღმოსავლეთის ქვეყნების და სხვა სახელმწიფოების, მათ შორის ჩინეთისა და ინდოეთის წარმომადგენლობა“, - განაცხადა უკრაინის პრეზიდენტმა.
მისი თქმით, „დიდ ოცეულში“ წარმოდგენილია სხვადასხვა ქვეყანა, რომლებსაც უკრაინისა და რუსეთის მიმართ განსხვავებული პოზიციები აქვთ და ზოგიერთი მათგანი რუსეთთან მუდმივ ეკონომიკურ ურთიერთობებსაც ინარჩუნებს.
„ჩემი აზრით, ეს არის ხელსაყრელი გარემო, რომელშიც შედეგის მიღწევა შესაძლებელია“, - აღნიშნა ზელენსკიმ.
უკრაინის პრეზიდენტმა დასძინა, რომ კიევი ასეთ ფორმატს მხარს დაუჭერს, თუ შესაბამისი შეთანხმება იქნება მიღწეული.
G20-ის სამიტი დეკემბერში მაიამიშია დაგეგმილი. აშშ-ის სახელმწიფო მდივანმა მარკო რუბიომ განაცხადა, რომ დონალდ ტრამპმა რუსეთის პრეზიდენტი ვლადიმირ პუტინი სამიტზე მიიწვია.
