ბრიუსელისთვის კანდიდატი ქვეყნები არიან მენიუში და ასე უყურებენ საქართველოს უსამშობლო მოქალაქეებიც, მათი მიზანია, როგორმე აღმოვჩნდეთ მენიუში და ვინ როგორ შეგვახრამუნებს, მაგას უნდა ვარკვევდეთ, – ამის შესახებ პარლამენტის თავმჯდომარემ, შალვა პაპუაშვილმა განაცხადა
პაპუაშვილს კითხვა დაუსვეს დიპლომატ გია ჯაფარიძის განცხადებაზე, რომ დღეს საქართველო ევროკავშირის მენიუში აღარ არის.
პარლამენტის თავმჯდომარემ კითხვის საპასუხოდ აღნიშნა, რომ გია ჯაფარიძემ ამ ფრაზით გაიმეორა ევროკომისრების ნარატივი საქართველოსთან და, ზოგადად, კანდიდატ ქვეყნებთან დაკავშირებით.
„ასე უყურებენ საქართველოს, რომ ჩვენი თავი ლანგრით უნდა მიართვან ევროკავშირის თუ ბრიუსელის ბიუროკრატებს. ეს არ არის წამოცდენა, ეს არის გამონათქვამი, რო მაგიდასთან თუ არ ზიხარ, ხარ მენიუში – თუ არ ხარ თანასწორი და არ ხარ გადაწყვეტილებების მიმღებთა შორის, ესე იგი შენზე სხვები იღებენ გადაწყვეტილებას. ამ წამოცდენით მან გაიმეორა ის, რასაც ბოლო პერიოდია, ზოგიერთი ევროკომისრის, მათ შორის მარტა კოსის მხრიდან ვისმენთ. ერთი, რომ კანდიდატ ქვეყნებს უყურებენ, როგორც მეორეხარისხოვან ხალხს და უკრძალავენ, მაგალითად, მაგასთან, ტრამპის იდეოლოგიურ საყრდენთან ურთიერთობას მაშინ, როდესაც თავად ურთიერთობენ.
რაღაცნაირად ჰგონიათ, რომ თავად არიან ჩვენი მეურვეები და ჩვენ არ გყოფნის მოწიფულობა თავად განვსაზღვროთ, ვისთან გვქონდეს ურთიერთობა. ასევე გაცხადებული იდეა, რომ ახალი წევრები მიღების შემთხვევაშიც იყვნენ მეორე კლასის წევრები, რომლებსაც არ ექნებათ ვეტოს უფლება, ანუ იქნებიან მენიუში. დღეს ასე უყურებს, ბრიუსელი, რომ კანდიდატი ქვეყნები არიან მენიუში და ასე უყურებენ საქართველოს უსამშობლო მოქალაქეებიც. მათი მიზანია, როგორმე აღმოვჩნდეთ მენიუში და ვინ როგორ შეგვახრამუნებს, მაგას უნდა ვარკვევდეთ ჩვენ“, – განაცხადა პაპუაშვილმა.
გია ჯაფარიძემ ერთ-ერთ ეთერში განაცხადა, რომ „ჩვენ „ქართული ოცნების“ მიზანმიმართული ქმედებებით ძალიან დიდი ხანია, აღარ ვართ ევროკავშირის „მენიუში“. მოლოდინი არც უნდა გვქონოდა, რომ საქართველო იქნებოდა ევროკომისიის პრეზიდენტის მოხსენებაში. ეს არ არის „ქართული ოცნების“ ბოსტანი, ეს ევროპის კავშირია, სადაც სიტყვას ფასი აქვს“. როგორც ჯაფარიძემ აღნიშნა, საქართველოს ხელისუფლების გადაწყვეტილებაა, რომ ქვეყანა ევროინტეგრაციის გზით აღარ მოძრაობს.
