ოკუპირებულ ცხინვალის რეგიონში ე.წ. ვადამდელი საპრეზიდენტო არჩევნები იმართება.
დე ფაქტო ცენტრალური საარჩევნო კომისიის ინფორმაციით, კენჭისყრა 18 სექტემბერს, დილის 08:00 საათზე დაიწყო და საარჩევნო უბნები 20:00 საათზე დაიხურება. არჩევნებში ოთხი კანდიდატი მონაწილეობს: დე ფაქტო პრეზიდენტის მოვალეობის შემსრულებელი მარატ კამბოლოვი, ზურაბ კოკოევი, მურატ ვალიევი და ყაზბეკ კოდოევი.
დე ფაქტო საარჩევნო კომისიის მონაცემებით, რეგიონში 70 ე.წ. საარჩევნო უბანია გახსნილი, კიდევ ხუთი კი - მოსკოვსა და ჩრდილოეთ ოსეთში. არჩევნებისთვის 40 ათასი ბიულეტენი დაიბეჭდა.
კენჭისყრის პროცესს 60-ზე მეტი "დამკვირვებელი" აკვირდება, მათ შორის რუსეთის სახელმწიფო დუმის, ფედერაციის საბჭოსა და რუსეთის ცენტრალური საარჩევნო კომისიის წარმომადგენლები, ასევე ვენესუელის, არგენტინის, ბელარუსის, სომხეთის, აფხაზეთის, ბულგარეთისა და ინდოეთის წარმომადგენლები.
ე.წ. არჩევნები მას შემდეგ დაინიშნა, რაც ალან გაგლოევმა ე.წ. პრეზიდენტის თანამდებობა ვადამდე დატოვა.
