„გახარია საქართველოსთვის“ „ქართულ ოცნებას“ შეკრებებისა და მანიფესტაციების შესახებ საკანონმდებლო ინიციატივაზე ხელახალი კენჭისყრის ჩატარებისკენ მოუწოდებს. გიგა ფარულავას განცხადებით, თუ უმრავლესობის 16 დეპუტატის მიერ ინიციატივის მხარდაჭერა, როგორც თავად განმარტავენ, ტექნიკური ხარვეზის შედეგი იყო, დეპუტატებს საკუთარი პოზიციის ხელახლა დაფიქსირების შესაძლებლობა უნდა მიეცეთ.
"თუ ეს ტექნიკური ხარვეზია, მაშინ მოვითხოვთ ხელახლა ჩატარდეს კენჭისყრა, ვინაიდან, როგორც ისინი ასახელებენ მიზეზს - ტექნიკურ ხარვეზს, ესე იგი ეს არ ასახავს დეპუტატების რეალურ ნებას.
მოვითხოვთ მოხდეს ხელახალი კენჭისყრა ამ კონკრეტულ კანონთან დაკავშირებით, რომ თითოეულ დეპუტატს ჰქონდეს დააფიქსიროს საკუთარი პოზიცია და კიდევ ერთხელ საზოგადოებამ ნათლად ნახოს, ვინ უჭერს მხარს დარჩეს რეპრესიული სამართლებრივი ნორმები ძალაში, რომელიც ჩვენს მოქალაქეებს უზღუდავს გამოხატვის თავისუფლებას. შესაბამისად, მოვუწოდებთ „ოცნებას“ ხელახალი კენჭისყრისკენ”, - განაცხადა გიგა ფარულავამ.
ფრაქცია „საქართველოსთვის“ ინიციატივა შეკრებებსა და მანიფესტაციებთან დაკავშირებული, 2024 წლამდე მოქმედი ნორმების აღდგენას ითვალისწინებს. კენჭისყრაზე მას სულ 28 დეპუტატმა დაუჭირა მხარი, მათ შორის „ქართული ოცნებისა“ და „ხალხის ძალის“ 16-მა წევრმა. უმრავლესობის წარმომადგენლები მოგვიანებით აცხადებდნენ, რომ მათი ხმების ნაწილი ტექნიკური ხარვეზის გამო დაფიქსირდა.
