15 სექტემბრის ღამეს უკრაინელმა სამხედროებმა ტაგანროგზე მასშტაბური სარაკეტო იერიში მიიტანეს, რის შედეგადაც Ozon-ის საწყობში და ტაგანროგის საავიაციო სამეცნიერო-ტექნიკურ კომპლექსში ხანძარი გაჩნდა. ინფორმაციას უკრაინული მედია ავრცელებს.
როსტოვის ოლქის გუბერნატორის, იური სლუსარის განცხადებით, ტაგანროგი „მასშტაბური სარაკეტო თავდასხმის“ სამიზნე გახდა.
„სარაკეტო თავდასხმის შედეგად დაზიანდა ორი მრავალბინიანი და სამი კერძო სახლის ფანჯრები, საგანმანათლებლო დაწესებულება, კომერციული შენობა, გაზის მილი, სასოფლო-სამეურნეო საწარმოების საწყობები, სასურსათო მაღაზია და Ozon-ის საწყობი“, - განაცხადა გუბერნატორმა.
ტაგანროგის საავიაციო სამეცნიერო-ტექნიკურ კომპლექსში სამხედრო თვითმფრინავებს არემონტებენ და მოდერნიზაციას უტარებენ.
ასევე, იერიში მიიტანეს სამარის ოლქში სიზრანის ნავთობგადამამუშავებელ ქარხანაზე. საწარმოს ტერიტორიაზე უპილოტო საფრენი აპარატების თავდასხმის შემდეგ ხანძარი გაჩნდა. უკრაინული დრონების იერიშის შემდეგ ქარხნის ტერიტორიაზე ცეცხლის რამდენიმე კერა დაფიქსირდა.
მოგვიანებით სამარის ოლქის გუბერნატორმა ვიაჩესლავ ფედორიშჩევმა განაცხადა, რომ რეგიონს ღამით დრონები დაესხა თავს, რის შედეგადაც „ერთ-ერთ სამრეწველო საწარმოში დაზიანებებია“. თუმცა, მას არ დაუკონკრეტებია, რომელ საწარმოზე იყო საუბარი.
