,„ოცნება" ჩვენი ქვეყნის ინტერესების საზიანოდ, პირდაპირ მოქმედებს. ყოფილ შინაგან საქმეთა მინისტრს წარუდგინეს ბრალი ქართულ ტერიტორიაზე, ქართული საპოლიციო საგუშაგოს ჩადგმასთან დაკავშირებით. ისინი არა მხოლოდ პოლიტიკურ განცხადებებს აკეთებენ, არამედ თავიანთი ქმედებებით, სამართლებრივ საფუძველს აძლევენ საოკუპაციო რეჟიმს ჩვენი ქვეყნის დეოკუპაციის წინააღმდეგ, - ამის შესახებ „გახარია საქართველოსთვის“ დეპუტატმა, გიგა ფარულავამ ჟურნალისტებთან განაცხადა.
მისი თქმით, თუ „ოცნებას“ გიორგი ბარამიძის განცხადება სამართლებრივ ჭრილში გადაჰყავს, თავად იაგო ხვიჩიაც უნდა იჯდეს მის გვერდით. მისივე თქმით, არანაკლებ მძიმე დანაშაული აქვს კობახიძეს, მდინარაძეს და იმ ადამიანებს, ვინც საქართველოს ადანაშაულებენ ომის დაწყებაში, მშვიდობიანი ქალაქის დაბომბვაში.
„ბარამიძის სიტყვები არის უმძიმესი პოლიტიკური დანაშაული და მან ამისთვის პოლიტიკური პასუხი უნდა აგოს. თუ „ოცნებას“ ეს სამართლებრივ ჭრილში გადაჰყავს, პირველ რიგში, თავად იაგო ხვიჩიაც უნდა იჯდეს მის გვერდით, ვინც რეალურად, ჩაიწერა, გაავრცელა და საზოგადოებას მიაწოდა ეს ინფორმაცია. ეს არ იყო პირდაპირი ეთერი, ეს იყო დამონტაჟებული გადაცემა, რომელიც დღემდე ინტერნეტსივრცეში დევს. მათი განვითარებული ლოგიკით, რატომ არის დღესაც ხელმისაწვდომი მასალა მთელი ინტერნეტსივრცისთვის და საზოგადოებისთვის?!
როდესაც „ოცნებას“ ბარამიძის კონკრეტული განცხადება გადაჰყავს სამართლებრივ ჭრილში, მინდა პარალელი გავავლო და ვთქვა, რომ ასევე, არანაკლებ უმძიმესი დანაშაული მიუძღვით მდინარაძეს, კობახიძეს, „ოცნების" იმ წევრებს, რომლებიც საქართველოს დღემდე ადანაშაულებენ ომის დაწყებაში. მათ, დღეს იქნება თუ ხვალ, აუცილებლად მოუწევთ უმკაცრესი პასუხისგება იმ ქმედებებისთვის, რაც ჩვენი სახელმწიფო ინტერესების წინააღმდეგ გააკეთეს.
„ოცნება" ჩვენი ქვეყნის ინტერესების საზიანოდ, პირდაპირ მოქმედებს. ყოფილ შინაგან საქმეთა მინისტრს წარუდგინეს ბრალი ქართულ ტერიტორიაზე, ქართული საპოლიციო საგუშაგოს ჩადგმასთან დაკავშირებით. ისინი არა მხოლოდ პოლიტიკურ განცხადებებს აკეთებენ, არამედ თავიანთი ქმედებებით, სამართლებრივ საფუძველს აძლევენ საოკუპაციო რეჟიმს ჩვენი ქვეყნის დეოკუპაციის წინააღმდეგ. ეს არის რეალობა. თუ მათ ბარამიძის ეს კონკრეტული პოლიტიკური განცხადებები გადაჰყავთ სამართლებრივ ჭრილში, არანაკლებ მძიმე დანაშაული აქვს კობახიძეს, მდინარაძესა და იმ ადამიანებს, ვინც დღესაც გამოდიან და საქართველოს ადანაშაულებენ ომის დაწყებაში, მშვიდობიანი ქალაქის დაბომბვაში," - განაცხადა ფარულავამ.
