დასავლეთის სანქციებით ვამაყობ, - ამის შესახებ საქართველოს ყოფილმა გენერალურმა პროკურორმა ოთარ რომანოვ-ფარცხალაძემ რუსულ სახელმწიფო გამოცემა TASS-ს განუცხადა.
„ჩემი მთავარი პრინციპი ყოველთვის ერთი იყო - სამართლიანობა, წესრიგი და დისციპლინა. სწორედ ჩემი სიმართლის თქმის გამო, მკაცრი პატრიოტული პოზიციისა და დასავლეთის წესებით თამაშზე უარის თქმის გამო უპრეცედენტო ზეწოლას დავექვემდებარე. აშშ-მა, ევროკავშირმა და დიდმა ბრიტანეთმა ორჯერ შემიყვანეს სანქცირებულთა სიებში. მაგრამ ეს სანქციები ჩემთვის სიმართლისთვის მიღებულ ორდენივითაა“, - განაცხადა მან.
რომანოვ-პარცხალაძემ აღნიშნა, რომ უკრაინაში რუსეთის სრულმასშტაბიანი ომის დაწყების შემდეგ განზე გადგომა არ შეეძლო და გადაწყვიტა, დახმარებოდა რუს სამხედროებს, ასევე დონბასისა და უკრაინის მოსაზღვრე რეგიონების მცხოვრებლებს.
მისი თქმით, 2025 წლის 9 მაისს, რუსეთის პრეზიდენტ ვლადიმირ პუტინისგან გამარჯვების აღლუმზე მიწვევის შემდეგ, მან საბოლოოდ გადაწყვიტა, მოხალისეთა კორპუს „არბატში“ ემსახურა, სადაც ცხრა თვე გაატარა.
„არბატში“ სამსახურის დასრულების შემდეგ მე და ჩემმა თანამოაზრეებმა გადავწყვიტეთ, შეგვექმნა ინტერნაციონალური მოხალისეობრივი დანაყოფი „გეორგიევსკი“, - განაცხადა რომანოვ-პარცხალაძემ.
მისი თქმით, „გეორგიევსკის“ რიგებში შედიან მოხალისეები, რომლებიც აფასებენ რუსეთისა და საქართველოს საერთო ისტორიასა და „საუკუნოვან ძმობას“.
„მათი მთავარი მოტივაციაა ქრისტიანული რწმენის, ტრადიციული ოჯახის, საკუთარი კულტურისა და იდენტობის დაცვა იმ სიგიჟისა და ზეწოლისგან, რომელსაც დღეს დასავლეთი თავს ახვევს. მათთვის რუსეთი ნორმალური, ჯანსაღი ადამიანური ღირებულებების საყრდენია და მათ მტკიცედ გადაწყვიტეს, ეს საყრდენი იარაღით ხელში დაიცვან“, - დასძინა მან.
