ევროკავშირის საგარეო პოლიტიკისა და უსაფრთხოების საკითხებში უმაღლესმა წარმომადგენელმა კაია კალასმა განაცხადა, რომ ლაიფციგის აეროპორტში უკრაინულ სატვირთო თვითმფრინავთან ასაფეთქებელი ასაფეთქებელი დრონის აღმოჩენას, სავარაუდოდ, რუსეთთან აქვს კავშირი.
ამის შესახებ კალასმა 1-ელ სექტემბერს, ირლანდიის ქალაქ ვიკლოუში ევროკავშირის თავდაცვის მინისტრების არაფორმალური შეხვედრის დაწყებამდე ჟურნალისტებს განუცხადა.
„მოდით, დაველოდოთ, რას იტყვის გერმანია და რა სადაზვერვო ინფორმაცია აქვს ამ თავდასხმასთან დაკავშირებით. შემდეგ განვიხილავთ, რისი გაკეთება შეგვიძლია. აშკარაა, რომ რუსეთიც... მე მას პირდაპირ ვუკავშირებ ამ საქმეს, თუმცა დაველოდოთ, რას იტყვიან გერმანელები, ვინ დგას თავდასხმის უკან“, - განაცხადა კალასმა.
მისივე თქმით, ევროპის ქვეყნებში რუსეთის მხრიდან სულ უფრო მეტი პროვოკაცია ფიქსირდება და ახლა მთავარი საკითხია, რა უნდა გააკეთოს ევროპამ მოსკოვის შემდგომი მსგავსი მოქმედებების შესაკავებლად.
4 აგვისტოს ლაიფციგის აეროპორტში უკრაინულ სამხედრო სატვირთო თვითმფრინავთან ახლოს ასაფეთქებელი მოწყობილობითა და დეტონატორით აღჭურვილი დრონი აღმოაჩინეს. გერმანიის ხელისუფლება ამ დრომდე ოფიციალურად არ ასახელებდა პასუხისმგებელს, თუმცა Reuters-ის ცნობით, ბერლინი რუსეთისთვის პასუხისმგებლობის დაკისრებას და შესაძლო ახალი სანქციების დაწესებას ამზადებს.
