არავითარი საფუძველი არ არსებობს იმის მტკიცებისა, რომ საქართველოს ხელისუფლება ჩვენს ქვეყანას აბრალებს ომის დაწყებას, - ამის შესახებ "ქართული ოცნების" დეპუტატმა გია ვოლსკიმ პარლამენტის პლენარულ სხდომაზე განაცხადა.
მისი თქმით, "ქართული ოცნება" ხელისუფლებაში რომ არ მოსულიყო, სწორედ მაშინ შერჩებოდა საქართველოს დამნაშავის სახელი.
„არავითარი წინაპირობა, საფუძველი არ არსებობს იმის მტკიცებისა, რომ საქართველოს ხელისუფლება ჩვენს ქვეყანას აბრალებს ომის დაწყებას. ასეული შემთხვევა შეიძლება გავიხსენო იმასთან დაკავშირებით, თუ რა კომენტარს აკეთებდა დღევანდელი ხელისუფლება, თუნდაც, იმ პერიოდის ადამიანები, რომლებიც თავისუფალ სივრცეში მსჯელობას არ ერიდებოდნენ. ბევრი კითხვა დარჩა და ამ კითხვებს მთლიანად რომ გასცემ პასუხს, მიხვდები, რომ კონსპირაციას ჰქონდა ადგილი. რატომ იყო სულ ლაპარაკი იმაზე, რომ რუსეთს არ აინტერესებს, ზოგადად, ცხინვალის რეგიონი, არ აინტერესებს აფხაზეთი?! რომ რუსეთი მოუწოდებს საქართველოს ხელისუფლებას, პროვოკატორ-სეპარატისტებს, ჩავიდნენ მოსკოვში, ვიმსჯელოთ, რა ხდება საერთოდ?! 8 აგვისტოს შუადღემდე ლაპარაკი არ იყო იმაზე, რომ რუსეთის ფედერაცია წარმოადგენდა საფრთხეს იმ თვალსაზრისით, რომ ქვეყანაში ოკუპაცია უნდა მომხდარიყო. რატომ არ გაიყვანეს მოსახლეობა?! რატომ აძალებდნენ სახელმწიფოს მიერ უკანონო შექმნილ სტრუქტურებს რომ იმ რეგიონში დარჩენილიყვნენ?! იმ ხალხმაც, ვინც იქ მუშაობდა, ვაჟკაცობა გამოიჩინა. რომ არა 1-2 ადამიანის პრინციპული პოზიცია, გაცილებით მეტი იქნებოდა მსხვერპლი მშვიდობიან მოსახლეობაში.
რატომ მოაწერეს ხელი ისეთ რეზოლუციას, სადაც წერია, რომ სწორედ საქართველოა მიზეზი იმისა, რომ ომი დაიწყო და ფართომასშტაბიანი გახდა? სულ სხვა კონტექსტით უნდა იქნეს ეს საკითხი განხილული და არა პრიმიტიულად - 7-ში დაიწყო ომი, თუ 8-ში. საიდან დაიწყო, როგორ ვითარდებოდა და ვის რა ინტერესი ჰქონდა ამასთან დაკავშირებით?! განგაში რატომ არ ატყდა ივლისში?! უშიშროების საბჭოს რატომ არ მიმართეს, რომ ყველამ იცოდა, სამხედრო სვლები მიმდინარეობდა როკის გვირაბის იქით?! ეს არის საკითხები.
დღევანდელ დღეს კიდევ გრძელდება ტენდენცია და ახლა ახალი ფორმა, ახალი სიძლიერე მიიღო იმ აზრმა, რომ როგორმე კიდევ ახალი დაპირისპირების კერა გაჩნდეს. ჩვენი პოლიტიკა ემყარება ერთ მთავარ მიზანს - რომ შეიქმნას ისეთი სიტუაცია, ნდობის ის ხარისხი იყოს, რომ როდესაც დადგება გარკვეული პერიოდი, დრო, ამ ვითარებაზე, რასაც ჩვენ უნდა ვქმნიდეთ ამ ბაზაზე, აშენდეს სრულმასშტაბიანი პოლიტიკური მოგვარების გარკვეული შენობა. ამას სჭირდება მოთმინებით და ინტენსიურად გეგმა-ზომიერად მუშაობა. ამ მიმართულებით მივდივართ.
პოლიტიკური მოსაზრებების საზოგადოებებზე მაქვს ლაპარაკი - რადიკალური განსხვავების მიუხედავად, ამოცანა არის ერთი - რომ ჩვენმა შვილებმა დღეს ერთმანეთს უყურონ არა თოფის სამიზნიდან, არამედ თვალებში ჩახედონ. ჯანსაღი მომავლის შესაქმნელად საჭიროა სტაბილური დამოკიდებულება.
კოლეგა ოპონენტებს შევახსენებ - „ქართული ოცნება“ ხელისუფლებაში რომ არ მოსულიყო, სწორედ მაშინ შერჩებოდა საქართველოს დამნაშავის სახელი და ვერც სტრასბურგის სასამართლოში ვერ იქნებოდა მოგებული ის საკმაოდ რთული საქმეები, რომელიც ჩვენმა იურისტებმა მოიგეს.
ჩვენთვის დღეს მთავარია ნდობის მშენებლობის ის პოლიტიკა, ის პროცესი, რომელიც მიმდინარეობს და ამ ყალბი განცხადებებით და პროპაგანდისტულ ველზე დივერსიული შემოჭრებით, რასაკვირველია, ჩვენ სერიოზულად დავზიანდებით,“ - განაცხადა ვოლსკიმ.
