უკრაინის პრეზიდენტმა ვოლოდიმირ ზელენსკიმ განაცხადა, რომ აშშ-ის პრეზიდენტ დონალდ ტრამპის წარმომადგენლები - სტივ უიტკოფი და ჯარედ კუშნერი რუსულ მხარესთან შეხვედრისა და უკრაინაში ვიზიტისთვის ემზადებიან. მისი თქმით, სექტემბერმა შესაძლოა რუსეთ-უკრაინის ომის საკითხში მნიშვნელოვანი ცვლილებები მოიტანოს.
„ახლახან ვესაუბრეთ პრეზიდენტ ტრამპის წარმომადგენლებს, სტივ უიტკოფსა და ჯარედ კუშნერს. ისინი ემზადებიან შეხვედრისთვის და შესაბამისი კომუნიკაციისთვის რუსეთის მხარესთან, ასევე უკრაინაში ვიზიტისთვის... ჩვენ განვიხილავდით, რა შეიძლება გაკეთდეს იმისთვის, რომ რუსეთს ომის დასრულების გზაზე დადგომისკენ ვუბიძგოთ“, - განაცხადა ზელენსკიმ ვიდეომიმართვისას
უკრაინის პრეზიდენტის თქმით, ამავდროულად, უკრაინული და პარტნიორი ქვეყნების დაზვერვების ინფორმაციით, რუსეთის ლიდერს პირადად კვლავ სურს ომის გაგრძელება, მიუხედავად იმისა, რომ რუსეთის საზოგადოების „აბსოლუტური უმრავლესობა“ მზად არის, ომის დასრულებას ფრონტის ამჟამინდელ ხაზზე დათანხმდეს.
„ვნახავთ, რას შეძლებენ აშშ-ის პრეზიდენტის წარმომადგენლები. სექტემბერში, შესაძლოა, ბევრი რამ შეიცვალოსდა საჭიროა, პარტნიორებთან ერთად ყველაფერი გავაკეთოთ ადამიანების, სიცოცხლისა და მშვიდობის დასაცავად“, - განაცხადა ზელენსკიმ.
მან ასევე აღნიშნა, რომ 31 აგვისტოს უკრაინული მხარის მიერ რუსეთის დაბომბვებზე საპასუხოდ განხორციელებული „დიპლომატიური დარტყმების“ შესახებ უკრაინის შეიარაღებული ძალების მთავარსარდლისა და უსაფრთხოების სამსახურის ხელმძღვანელისგან ანგარიში მოისმინა.
„ჩვენ ვამზადებთ ჩვენს ნაბიჯებს. ახალ ნაბიჯებს“, - განაცხადა პრეზიდენტმა.
მან კიდევ ერთხელ აღნიშნა, რომ ასევე მნიშვნელოვანია, პარტნიორებთან მიღწეული შეთანხმებები უკრაინისთვის დახმარების შესახებ პრაქტიკაში განხორციელდეს.
„პრემიერ-მინისტრთან და უკრაინის დიპლომატიურ გუნდთან დეტალურად განვიხილეთ სექტემბერში გასატარებელი ზომები. ბევრი რამ არის დაგეგმილი“, - თქვა ზელენსკიმ.
