ოზურგეთში ავარიის შედეგად 16 წლის გოგო დაიღუპა. გავრცელებული ცნობით, ის თბილისში ცხოვრობდა და სოფელ გომში სტუმრად იმყოფებოდა. დაშავებულია კიდევ 4 არასრულწლოვანი.
როგორც "გურიის მოამბ"ე თვითმხილველებზე დაყრდნობით წერს, მანქანა, რომელშიც ახალგაზრდები ისხდნენ, ჯერ ბორდიურს დაეჯახა, შემდეგ კი ადგილობრივი მაცხოვრებლის ეზოში შევარდა. გამოცემის ცნობითვე, დაშავებულებიდან ერთი სოფელ წითელმთიდანაა, დანარჩენი კი გომიდან
“როცა კლინიკაში შემოიყვანეს დაზარალებულს აღენიშნებოდა სიცოცხლისათვის შეუთავსებელი ტრავმები-ქალა ფუძის და მენჯის ძვლის მოტეხილობა, ღვიძლის დაზიანება და სხვა. მისი გადარჩენა შეუძლებელი იყო... დაშავებულები ამ წუთისთვის “მედალფას” კლინიკაში იმყოფებიან სხვადასხვა სახის მოტეხილობებითა და ჭრილობებით, მათ სიცოცხლეს საფრთხე არ ემუქრება” - განაცხადეს ოზურგეთის კლინიკაში
მომხდარზე გამოძიება სისხლის სამართლის კოდექსის 276-ე მუხლით მიმდინარეობს, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს
