ბრიტანეთის პრემიერ-მინისტრი ენდი ბერნემი დღეს, უკრაინის დამოუკიდებლობის დღესთან დაკავშირებით, კიევში ვიზიტისას გამოაცხადებს, რომ მისი ქვეყანა უკრაინის შორ მანძილზე მოქმედი რაკეტების, მათ შორის Scalp-ის წარმოების შესაძლებლობებს გააძლიერებს.
ამის შეასხებ The Guardian ბრიტანეთის მთავრობის ვებგვერდზე გამოქვეყნებულ ინფორმაციაზე დაყრდნობით წერს.
ეს ბერნემის პირველი ვიზიტი იქნება უკრაინაში პრემიერ-მინისტრის რანგში.
გამოცემა წერს, რომ ბერნემი ორშაბათს დილით უკრაინის დედაქალაქში ჩავა, ომისთვის გადამწყვეტ მომენტში, როდესაც კიევი რუსეთის მიერ სარაკეტო დარტყმების მორიგი ტალღისთვის ემზადება, ხოლო ქვეყნის პრეზიდენტი ვოლოდიმირ ზელენსკი ყველაზე სერიოზული შიდა გამოწვევის წინაშე დგას.
ბრიტანეთის პრემიერ-მინისტრი ვიზიტისას გამოაცხადებს, რომ ბრიტანეთის მთავრობა ევროპულ თავდაცვის კომპანია MBDA-ს ნებას დართავს, გაასაჯაროოს ინფორმაცია ანგლო-ფრანგული „Storm Shadow/Scalp“-ის რაკეტებში გამოყენებული ბრიტანული კომპონენტების შესახებ, რათა უკრაინას საკუთარი ვერსიის შექმნაში დაეხმაროს.
„მიუხედავად იმისა, რომ, სავარაუდოდ, რამდენიმე წელი იქნება საჭირო, ვიდრე ეს გადაწყვეტილება ომის მიმდინარეობაზე გავლენას მოახდენს, ის, დიდი ალბათობით, მოსკოვთან დაძაბულობას გაზრდის ისედაც დაძაბულ ვითარებაში ბრიტანეთსა და რუსეთს შორის ურთიერთობებში“, - აღნიშნავს გამოცემა.
ბერნემი კიევში გამოაცხადებს, რომ ბრიტანეთი საფრანგეთს უკრაინაში შორ მანძილზე მოქმედი რაკეტების ასაწყობი ხაზების ამოქმედებაში დაეხმარება. ამის შესახებ საფრანგეთის პრეზიდენტმა ემანუელ მაკრონმა გასულ თვეში განაცხადა.
მედია აღნიშნაბს, რომ ბრიტანეთის განცხადება ბევრად უფრო მასშტაბური და გრძელვადიანი პროექტის ფარგლებში გადადგმული მცირე ნაბიჯია. პროექტმა შესაძლოა რამდენიმე წელიწადში უკრაინას საკუთარი, შორ მანძილზე მოქმედი Storm Shadow-ის ტიპის ფრთოსანი რაკეტების წარმოების შესაძლებლობა მისცეს.
The Guardian-ის პროგნოზით, ეს ნაბიჯი, სავარაუდოდ, მოსკოვის მხრიდან კრიტიკის მორიგ ტალღას გამოიწვევს იმ ფონზე, როდესაც ბრიტანეთსა და რუსეთს შორის დაძაბულობა ისედაც მაღალია.
გასულ კვირას რუსეთმა ბრიტანეთი კონფლიქტის განზრახ ესკალაციაში დაადანაშაულა იმის გამო, რომ ლონდონი უკრაინას ბრიტანული წარმოების დრონებით რუსეთის ტერიტორიაზე დარტყმების განხორციელების საშუალებას აძლევს. მოსკოვმა გააფრთხილა, რომ რაც უფრო მეტად ჩაერთვება ბრიტანეთი კონფლიქტში, „მით უფრო მაღალ ფასს გადაიხდის“.
