უკრაინის პრეზიდენტის, ვოლოდიმირ ზელენსკის თქმით, აშშ-ის სპეციალური წარმომადგენლები სტივ უიტკოფი და ჯარედ კუშნერი ცდილობენ რუსეთთან მოლაპარაკებების ფორმატის მოძებნას, თუმცა მათ უჭირთ ისეთი სცენარის პოვნა, რომლის პირობებშიც მოსკოვი ომის შეწყვეტას უკრაინის მიერ დონბასის დატოვების და, როგორც მან აღნიშნა, სხვა „უღირსი გადაწყვეტილებების“ მიღების გარეშე დათანხმდებოდა.
„მათ ძალიან უჭირთ ისეთი ფორმატის პოვნა, რომ რუსები ომის დასრულებას უკრაინის დონბასიდან გასვლისა და სხვა უღირსი გადაწყვეტილებების გარეშე დათანხმდნენ“ - თქვა ზელენსკიმ,.
ზელენსკის განცხადებით, უკრაინას ასევე სჭირდება რეალისტური უსაფრთხოების გარანტიები, თუმცა „ამ ეტაპზე არც ამერიკას, არც ევროპას და არც სხვას არ შეუძლია ასეთი გარანტიების მოცემა.
"სიგნალი ასეთია: რუსები მხოლოდ იმაზე დგანან, რომ უკრაინელებმა თავიანთი ქვეყნის აღმოსავლეთი დატოვონ, წინააღმდეგ შემთხვევაში კი ისინი თავად დაიკავებენ მას. რუსებს არ აინტერესებთ, რამდენი მსხვერპლი ექნებათ და რამდენი დრო დასჭირდება ამას. მათ მაინც სურთ ამ მიზნის მიღწევა. მე აქ ერთი კითხვა მაქვს: ვინ მოგვცემს გარანტიას, რომ ისინი უფრო შორს აღარ წავლენ? გეუბნებით: ჯერჯერობით ვერც ამერიკა, ვერც ევროპა და ვერც ვერავინ მოგვცემს ასეთ გარანტიას. თუმცა ცნობილია, რომ რუსებს უფრო შორს წასვლა სურთ“, - განაცხადა უკრაინის პრეზიდენტმა.
ზელენსკის თქმით, კუშნერთან და უიტკოფთან შეთანხმდნენ, რომ ომის დასრულების რეალურ შესაძლებლობებზე იმსჯელებენ.
მისივე თქმით, მოლაპარაკებების მაგიდაზე ამჟამად სამი ძირითადი იდეაა: ცეცხლის შეწყვეტა, თავისუფალი ეკონომიკური ზონის შექმნა და ევროკავშირისა და ნატოს როლის განსაზღვრა უსაფრთხოების უზრუნველყოფაში.
„თუ მოკლედ ვიტყვით, იქ არის ცეცხლის შეწყვეტის ერთ-ერთი იდეა - ეს არის მთავარი. მეორე ნაწილი არის ის, რაც ამერიკელებმა თავისუფალ ეკონომიკურ ზონასთან დაკავშირებით შემოგვთავაზეს. და მესამე - რას გააკეთებენ ევროკავშირი და ნატო და რისთვის არის მზად უკრაინა? ამ ყველაფერს ყველა დადებითად შეხვდა, არავის აქვს წინააღმდეგობა. ეს არის ის, რაც დღეს მოლაპარაკებების მაგიდაზე დევს. ამერიკულ მხარეს კიდევ რამდენიმე იდეა აქვს, როგორც ჩვენთვის ცნობილია. მათ სურთ შესაფერისი მომენტის პოვნა, რომ ეს იდეები გაგვიზიარონ. ჩვენ მათ ველოდებით“, - განაცხადა ზელენსკიმ.
მისივე თქმით, ეს არის ამერიკელებთან და ევროპელებთან ერთობლივად შემუშავებული იდეები, ასევე აშშ-ის მხარის უკრაინასა და რუსეთთან მოლაპარაკებების შედეგად ჩამოყალიბებული წინადადებები, რის გამოც, მისი შეფასებით, ისინი რეალისტური შეიძლება იყოს.
