უკრაინის პრეზიდენტმა ვოლოდიმირ ზელენსკიმ განაცხადა, რომ რუსეთს კვლავ აქვს თეორიული შესაძლებლობა, ბრიანსკის ოლქიდან ჩერნიჰივისა და კიევის ოლქების მიმართულებით შეტევა განახორციელოს. ამასთან, მისი თქმით, ამ მიმართულებაზე ამჟამად რუსული ჯარების გადაადგილება არ ფიქსირდება.
ამის შესახებ ზელენსკიმ ჟურნალისტებთან საუბრისას განაცხადა.
„პუტინის უცვლელი, უპირველესი მიზანი ფრონტზე კონსტანტინოვკა-სლავიანსკის მიმართულებაა. ბოლო ვადა, რომელიც მან გენერლებს დაუწესა, არის წლის ბოლომდე დონეცკისა და ლუჰანსკის ოლქების ოკუპაციის დასრულება. ეს შეუძლებელია - ასეთია ჩვენი პასუხი“, - განაცხადა ზელენსკიმ.
ამასთან, ჟურნალისტების შეკითხვის პასუხად პრეზიდენტმა გამოთქვა ვარაუდი, რომ აღმოსავლეთ უკრაინაში რუსეთის ჯარების წარმატების შემთხვევაში, მოსკოვმა შესაძლოა ძალები სხვა მიმართულებებზე გადაიყვანოს.
„თუ ის 300 ათას ახალმობილიზებულს ჩვენი ქვეყნის აღმოსავლეთში შექმნილი ვითარების მიხედვით გადაანაწილებს და იქ იმ წარმატებას მიაღწევს, რომლის იმედიც აქვს, მაშინ მას შეუძლია ძალები სხვა მიმართულებაზე გადაიყვანოს. მაგალითად, „ბუფერული ზონის“ შესაქმნელად. ასევე შესაძლებელია ჩერნიჰოვისა და კიევის ოლქების მიმართულება, მას აქვს მოსაზრებები და თეორიული განზრახვები, რომ ამ მიმართულებით რუსეთიდან, ბრიანსკის ოლქიდან შეტევა განახორციელოს“, განაცხადა უკრაინის პრეზიდენტმა.
მან ხაზი გაუსვა, რომ უკრაინული მხარე ვითარებას აკვირდება. ზელენსკის თქმით, ამ დროისთვის ბრიანსკის ოლქში რუსული ჯარების პირადი შემადგენლობა არ ფიქსირდება, თუმცა უკრაინელი სამხედროები რუსეთის საზღვრის გასწვრივ რუსულ სამხედრო ტექნიკას ხედავენ.
