ირაკლი ღარიბაშვილი საკუთარ თავს იზიანებს და მნიშვნელოვანია, რომ მეტი გონიერება გამოიჩინოს ასეთი განცხადებების დროს, - ამის შესახებ პარლამენტის კულტურის კომიტეტის თავმჯდომარემ, გიორგი გაბუნიამ ჟურნალისტებს განუცხადა.
გაბუნია პატიმრობაში მყოფი საქართველოს ყოფილი პრემიერ-მინისტრის, ირაკლი ღარიბაშვილის მიერ ციხიდან გავრცელებულ წერილებს გამოეხმაურა.
გაბუნია ყოფილ პრემიერს ურჩევს, "ისედაც დაზიანებული რეპუტაცია კიდევ უფრო მეტად არ დაიზიანოს".
"ვინ უნდა დაემუქროს და რატომ უნდა დაემუქროს? თუ რეალურად განხორციელდა რაიმე სახის უკანონო ქმედება, რა თქმა უნდა, ეს სამართალდამცავი უწყებების გამოძიების საკითხია, მაგრამ ამ მოცემულობით, მას აქვს განსაზღვრული კონკრეტული სასჯელი, ის არის მსჯავრდებული მძიმე დანაშაულთან მიმართებით და შესაბამისად, ამ საკითხში, კითხვები არ არსებობს და რატომ, იმიტომ, რომ მან აღიარა ჩადენილი დანაშაული და თუ კონკრეტულ შანტაჟზე, მუქარაზე და რაიმე სახის უკანონო ქმედებაზე არის საუბარი, რა თქმა უნდა, ეს არის სამართალდამცავი ორგანოების გამოძიების საკითხი. ამიტომ, რეალურად, ჩვენ აქ გვაქვს საუბარი ურთიერთსაწინააღმდეგო განცხადებებთან და იმ დამაზიანებელ განცხადებებთან, რითაც ის საკუთარ თავს იზიანებს, ამიტომ მნიშვნელოვანია, რომ მეტი გონიერება გამოიჩინოს ასეთი განცხადებების დროს და მნიშვნელოვანია, რომ ის ზიანი, რაც მიადგა მას და მის რეპუტაციას კიდევ უფრო მეტად არ დაიზიანოს", - ამბობს გიორგი გაბუნია.
