ვაუჩერების დარიგება ხელისუფლების ვირტუალური სამყაროს მსხვრევის დადასტურებაა. ამის შესახებ "ქრისტიან-დემოკრატების" წევრმა ლევან ვეფხვაძემ დღეს, პლენარულ სხდომაზე სიტყვით გამოსვლისას განაცხადა.
"ვაუჩერების დარიგების გადაწყვეტილება მნიშვნელოვანია მაშინ, როცა მთავრობა ამტკიცებს, რომ საზოგადოება დალხენილია", - აღნიშნა ვეფხვაძემ.
მისი თქმით, '"ქრისტიან-დემოკრატები" სოფლებში ჩავიდნენ, სადაც ნათელია, რომ სოფლის მოსახლეობისთვის ეს 20 და 30 ლარიანი ვაუჩერები, გადარჩენის ერთადერთი საშუალებაა, ეს კი ადასტურებს იმას, რომ მართლაც არ არის ქვეყანაში ისეთი ვირტუალური მდგომარეობა, რასაც ხელისუფლება ტელევიზიების საშუალებით უმტკიცებს ხალხს.
"როცა მთავრობას ბრმების მთავრობა უწოდა გიორგი თარგამაძემ პარლამენტში გამართული დებატებისას, ახლობელმა დამირეკა და დაინტერესდა, ხომ არ ეწყინებოდათ ეს განცხადება უსინათლოებს. მე განვუმარტე, რომ ვგულისხმობდით იმ მთავრობას, რომლებსაც თვალის ჩინი აქვთ, მაგრამ ვერაფერს ხედავენ. ჩემი ახლობელი დამეთანხმა და თქვა, რომ მართალია, მთავრობა გვიმტკიცებს დალხენილი ვცხოვრობთო, მაგრამ 20-30 ლარის მათხოვრები გაგვხადაო", - აღნიშნა ვეფხვაძემ.