„ოცნებას“ ახლა ისღა დარჩა, რუსებს უთხრას, დავსჯით ყველას, ვისაც შენ არ უყვარხარო, მაგრამ არც ეს გამოუვათ, არა აქვთ კარგად საქმე არც რუსებს და არც მათ ქართულ ვერსიას, - ამის შესახებ პატიმრობაში მყოფი „დროას“ ლიდერი ელენე ხოშტარია აცხადებს, რომლის განცხადებაც მის „ფეისბუქის“ გვერდზე გამოქვეყნდა.
ხოშტარიას თქმით, „ოცნებას“ პუტინთან თავის მართლება უწევს, რატომ ვერ დაიმორჩილა ამდენი ხანი ხალხი“.
„ოკუპაციის ხსენების მარგინალიზებას რამდენიმე მიზეზი აქვს: ერთი, რაც პირდაპირ ზედაპირზეა - „ოცნება“ არის რუსული.
ეს ფაქტი დადასტურებულია საერთაშორისო სანქციებით და ამაზე ბევრს არ ვილაპარაკებ.
მეორე და საინტერესო არის ის, რომ „ოცნებას“ უწევს პუტინთან თავის მართლება, რატომ ამდენი ხანი ვერ დაიმორჩილა ხალხი. ესეც დადასტურებული ფაქტია: არჩევნები გააყალბა, ლეგიტიმაცია ვერ მოიპოვა; ხალხი ცემა და დაწამლა, პროტესტი ვერ გააჩერა; ევროპა მტრად გამოაცხადა, მაინც ფრიალებს ევროპული დროშა საქართველოში.
ეხლა ისღა დარჩა, უთხრას რუსებს, დავსჯით ყველას, ვისაც შენ არ უყვარხარო, მაგრამ არც ეს გამოუვათ. არა აქვთ კარგად საქმე არც რუსებს და არც მათ ქართულ ვერსიას. მათი მარცხი გარდაუვალია. ასეთია ისტორიული ლოგიკა და ამაზე მეტყველებს ყველაფერი. ჩვენ უნდა გამოვიჩინოთ გამძლეობა, წინააღმდეგობა და ეს ორი წარმავალი რეჟიმი აუცილებლად დასრულდება.
რუსეთი ოკუპანტია, რუსეთი მოღალატეა.
ბოლომდე!“, - წერს ელენე ხოშტარია.
