უკრაინამ რუსეთს ცეცხლის შეწყვეტის სხვადასხვა ფორმატი შესთავაზა, თუმცა მოსკოვი ამისთვის მზად არ არის. ამის შესახებ DW-ის ეთერში უკრაინის პრეზიდენტის ოფისის ხელმძღვანელის მრჩეველმა მიხაილო პოდოლიაკმა განაცხადა.
„ჩვენ ყველა შესაძლო ფორმატს ვთავაზობთ: როგორც სრულ ცეცხლის შეწყვეტას, ისე საჰაერო სივრცეში და ენერგეტიკულ ობიექტებზე ზავის გამოცხადებას. არსებობს არაერთი შესაძლო ფორმატი. გარდა ამისა, შეთავაზებულია ფრონტის ხაზზე საომარი მოქმედებების გაყინვაც, რათა ამის შემდეგ რთული მოლაპარაკებების წარმოება გახდეს შესაძლებელი“, - განაცხადა პოდოლიაკმა.
მისივე თქმით, პრეზიდენტი ვოლოდიმირ ზელენსკი ვლადიმირ პუტინთან პირადი შეხვედრისთვისაც მზად არის.
„უკრაინის პრეზიდენტს არაერთხელ უთქვამს, რომ მზად არის პირადი შეხვედრისთვისაც, რათა რთული საკითხები განიხილონ. შეერთებული შტატები ამ პოზიციას სრულად უჭერს მხარს“, –-აღნიშნა პრეზიდენტის ოფისის ხელმძღვანელის მრჩეველმა.
პოდოლიაკის თქმით, ამავდროულად, კრემლის ლიდერი უკრაინაში ომთან დაკავშირებით მოლაპარაკებებისთვის მზად არ არის.
„ის ერთ იდეაზეა ჩაციკლული და ამ იდეის გარშემო საკუთარ წარმოსახვაში მთელი სამყარო ააგო. იქიდან მისი გამოყვანა პრაქტიკულად შეუძლებელია, თუ მედიკამენტური ჩარევა არ მოხდა. სამწუხაროდ. ჩვენ ნებისმიერ წინადადებას წამოვაყენებთ. შეერთებული შტატებიც ნებისმიერ წინადადებას წამოაყენებს. მაგრამ ვიდრე რუსეთში არ გაღრმავდება კრიზისი, რომელიც Wildberries-ზე, ნავთობგადამამუშავებელ ქარხნებზე დარტყმებს, საწვავისა და პროდუქტების დეფიციტს, ასევე მცირე, საშუალო და მსხვილი ბიზნესისთვის მნიშვნელოვან დანაკარგებს უკავშირდება, არაფერი შეიცვლება. ვიდრე რუსეთში შიდა ზეწოლა იმ დონემდე არ გაიზრდება, რომ შიშს გამოიწვევს, ვერანაირ პასუხს ვერ მიიღებთ“, - განაცხადა პოდოლიაკმა.
