უკრაინის პრეზიდენტი ვოლოდიმირ ზელენსკი პარტნიორებს Patriot-ის რაკეტების გადაცემისა და რუსეთის წინააღმდეგ ახალი სანქციების დაწესებისკენ მოუწოდებს.
ამის შესახებ უკრაინის პრეზიდენმას ვიდეომიმართვისას ისაუბრა
„Patriot-ისთვის საჭირო რაკეტები მსოფლიოში არსებობს. მნიშვნელოვანია, რომ პარტნიორებმა მათი გადაცემის პოლიტიკური გადაწყვეტილება მიიღონ. ამერიკის შეერთებულმა შტატებმა იცის, რა გვჭირდება. ევროპამაც იცის, რა გვჭირდება.
ანტიბალისტიკური რაკეტები ადამიანების დასაცავად უნდა გამოიყენებოდეს და არა საწყობებში ინახებოდეს. ყოველი დღე, როდესაც ასეთი მნიშვნელოვანი დახმარება არ მოდის, რუსეთს ადამიანების მკვლელობის დამატებით შესაძლებლობას აძლევს,“ - განაცხადა ზელენსკიმ.
ზელენსკიმ ასევე პარტნიორებს რუსეთის წინააღმდეგ დამატებითი სანქციების დაწესებისკენ მოუწოდა და განაცხადა, რომ უახლოეს პერიოდში უკრაინის ელჩებთან გლობალური თათბირი გაიმართება.
„ყველა იურიდიული და ფიზიკური პირი, ვინც რუსეთში ბალისტიკური იარაღის - გამშვები დანადგარების, რაკეტების წარმოებაში ჩართულ საწარმოებს ეხმარება, აწვდის კომპონენტებსა და სხვა საჭირო რესურსებს, სანქციების ქვეშ უნდა მოექცეს. ეს მხოლოდ ჩვენი კი არა, ჩვენი პარტნიორების სანქციებიც უნდა იყოს. G7-ის იურისდიქციებში ჯერ კიდევ არსებობს ხარვეზები და ჩვენს დიპლომატებს ამ საკითხზე მუშაობა მოუწევთ.
საწვავის მიმართულება: ყველაფერი, რაც ახლა რუსეთს ნავთობგადამუშავების აღდგენაში ეხმარება, გარანტირებულად უნდა შეჩერდეს. ამის შესახებ უკრაინის ელჩებთანაც ვისაუბრებთ უახლოეს პერიოდში გლობალური შეხვედრა გაიმართება. თითოეულ მიმართულებაზე რეალური შედეგებია საჭირო - იარაღი უკრაინისთვის, სანქციები რუსეთის წინააღმდეგ“, - განაცხადა ზელენსკიმ.
უკრაინის პრეზიდენტმა ასევე განაცხადა, რომ უკრაინის დელეგაციის წევრებთან რუსტემ უმეროვითან, კირილო ბუდანოვითან, სერჰი კისლიცასა და პავლო პალისასთან ისაუბრა.
„ვიმედოვნებ, რომ მომდევნო კვირები უშედეგოდ არ ჩაივლის. ამერიკას შეუძლია აქტიურად მოქმედება“, - დასძინა ზელენსკიმ.
1-ელ აგვისტოს ღამეს რუსეთმა კიევსა და კიევის ოლქზე ბალისტიკური რაკეტებით მასშტაბური იერიშები მიიტანა.. მტრის თავდასხმის შედეგად უკრაინის დედაქალაქის ხუთ რაიონში ხანძარი და ნგრევა დაფიქსირდა.
თავდასხმის შედეგად კიევში 9 ადამიანი დაიღუპა, კიდევ 33 დაშავდა. კიევის ოლქში დაიღუპა ერთი ადამიანი, ხოლო 9 დაშავდა.
