აშშ-ის პრეზიდენტმა დონალდ ტრამპმა გასულ კვირას ოფიციალურად აცნობა კონგრესს ირანზე სამხედრო დარტყმების განახლების შესახებ და დაიტოვა უფლება, საკანონმდებლო ორგანოს დამატებითი თანხმობის გარეშე, თეირანზე იერიშები 60 დღის განმავლობაში განახორციელოს.
ამის შესახებ ნათქვამია ამერიკის პრეზიდენტის წერილში კონგრესის ორივე პალატისადმი, რომელიც გამოცემა The Hill-მა მოიპოვა.
ტრამპმა სენატსა და წარმომადგენელთა პალატას აცნობა ირანზე დარტყმების განახლების შესახებ სამხედრო უფლებამოსილების შესახებ კანონის შესაბამისად. ეს კანონი ითვალისწინებს, რომ მთავარსარდალმა კონგრესს ორი დღის განმავლობაში უნდა შეატყობინოს საზღვარგარეთ სამხედრო მოქმედებების დაწყების შესახებ.
პარასკევს, ორგვერდიან წერილში, აშშ-ის პრეზიდენტმა კანონმდებლებს აცნობა, რომ ამერიკული დარტყმები 7 ივლისს განახლდა.
„ამ დარტყმებში შეერთებული შტატების სახმელეთო ძალები არ მონაწილეობენ. ეს იერიშები შეზღუდული, ზუსტი, დაგეგმილი და განხორციელებულია ისე, რომ სამოქალაქო მოსახლეობაში დანაკარგები მინიმუმამდე შემცირდეს“, - დაწერა ტრამპმა.
კონგრესისთვის შეტყობინების გაგზავნის შემდეგ, ამერიკულ სამხედრო ძალებს რეგიონში ყოფნა 60 დღის განმავლობაში შეუძლიათ. სამხედრო უფლებამოსილების შესახებ კანონის მიხედვით, მთავარსარდალს შეუძლია მათი განთავსება დამატებით 30 დღით გაახანგრძლივოს. თუმცა, ამ ვადის გადაჭარბება კონგრესის დამატებით თანხმობას მოითხოვს.
13 ივლისს, აშშ-ის პრეზიდენტმა განაცხადა, რომ ირანის საზღვაო პორტების ბლოკადა კვლავ ამოქმედდება და ჰორმუზის სრუტეში სატვირთო გემების გადაადგილებაზე გადასახადის დაწესებას გეგმავს.
