დიდმა ბრიტანეთმა Ту-142-ის ტიპის ორი რუსული თვითმფრინავი ჩაჭრა, რომლებიც ნორვეგიის ზღვაში არაერთხელ მიუახლოვდნენ ბრიტანული ავიამზიდის საბრძოლო ჯგუფს და ასრულებდნენ „საშიშ და არაპროფესიონალურ“ მანევრებს.
ამის შესახებ Politico ბრიტანეთის თავდაცვის სამინისტროზე დაყრდნობით იუწყება.
რუსული თვითმფრინავები ჩაჭრეს და გააცილეს F-35-ის ტიპის ბრიტანულმა გამანადგურებლებმა, რომლებიც ნორვეგიის ზღვაში ავიამზიდ HMS Prince of Wales-იდან აფრინდნენ.
აღნიშნულია, რომ რუსულმა Ту-142-ებმა ავიამზიდის უშუალო სიახლოვეს დიდი რაოდენობით სონობუები ჩამოყარეს - მოწყობილობები, რომლებიც შეიძლება გამოიყენებოდეს წყალქვეშა „მიკროფონების“ ფუნქციით წყალქვეშა ნავების აღმოჩენისა და თვალყურის დევნისთვის.
ეს ნაბიჯი გადაიდგა იმ ფონზე, რომ გაერთიანებულმა სამეფომ პირველად ჩაიბარა ნატო-ს სპეციალური ძალების დანაყოფის მეთაურობა, რომელსაც თავდაცვის სამინისტრო აღწერს, როგორც ალიანსის სწრაფი განლაგების ჯგუფების „მოწინავე დანაყოფს“, „რომელსაც შეუძლია რამდენიმე დღეში მსოფლიოს ნებისმიერ წერტილში განლაგდეს“.
გასულ კვირას გავრცელდა ინფორმაცია, რომ რუსეთის ლიდერის ვლადიმირ პუტინის სუპერიახტა, რომლის ღირებულება 100 მილიონ ფუნტ სტერლინგს შეადგენს, ნორვეგიის სანაპიროს გასწვრივ გადაადგილდება და ბრუნდება რუსეთში. ასევე ის დაფიქსირდა დანიასთან ახლოს.
Politico-სთან საუბარში თავდაცვის მინისტრმა დენ ჯარვისმა უარი თქვა ეთქვა, აკვირდება თუ არა ავიამზიდი HMS Prince of Wales ამ გემს, მაგრამ აღნიშნა, რომ „ჩვენ ვიცით, სად არის იგი“.
„მისი გადაადგილების ფაქტი - ეს კიდევ ერთი საბრძოლო ინდიკატორია, იმისა, რომ ის [პუტინი] სულ უფრო დიდ ზეწოლას განიცდის“, - დაამატა ბრიტანელმა მინისტრმა.
მედიის ვნობით, იახტა უკრაინაში სრულმასშტაბიანი შეჭრის წინ გერმანიის ქალაქ ჰამბურგში სარემონტოდ იმყოფებოდა და იქიდან 7 თებერვალს - სრულმასშტაბიანი ომის დაწყებამდე ჩვიდმეტი დღით ადრე გავიდა.
ამასთან, ივნისშიც გავრცელდა ინფორმაცია, რომ შვედეთის სამხედრო-საჰაერო ძალების გამანადგურებლები ორჯერ აფრინდნენ რუსული თვითმფრინავების შესაჩერებლად ბალტიის ზღვის თავზე.
