ესტონეთში დისლოცირებულმა აშშ-ის სამხედროების დიდმა ნაწილმა ქვეყანა დატოვა ევროპაში სამხედრო კონტიგენტის ყოფნის გადახედვის ფონზე, რომელიც პენტაგონში მიმდინარეობს. ინფორმაციას ERR ავრცელებს.
ესტონეთის თავდაცვის მინისტრმა ჰანო პევკურმა განაცხადა, რომ ზაფხულში ქვეყანაში ახალი ამერიკული კონტინგენტი უნდა ჩავიდეს, რომელიც წლის ბოლომდე დარჩება, თუმცა დეტალები ჯერ უცნობია.
მისი თქმით, საბოლოო გადაწყვეტილებები დამოკიდებულია პენტაგონის მიერ ჩატარებულ ექვსთვიან მიმოხილვაზე.
ამჟამად ესტონეთში დარჩენილია 100-ზე ნაკლები ამერიკელი სამხედრო, მაშინ როცა ადრე მათი რაოდენობა 500–700-ს აღწევდა. ის იყო როტაციული ძალების ნაწილი, რომელიც ძირითადად განთავსებული იყო ტაპას სამხედრო ბაზაზე.
მინისტრის განცხადებით, ამჟამად გაურკვეველია, როგორ განაწილდება მომავალი როტაციული ქვედანაყოფები პოლონეთსა და რუმინეთში მდებარე ბრიგადებიდან და იქნება თუ არა მათი ნაწილი ესტონეთში გაგზავნილი.
„ ეს ზუსტად როდის მოხდება პოლონეთში, რა თქმა უნდა, ერთწლიანი საკითხი არ არის. ეს ხანგრძლივი პროცესია. ასევე გაირკვევა, დაიწყებენ თუ არა ესტონეთში როტაციული ქვედანაყოფების ჩამოსვლას ამ ბრიგადის შემადგენლობიდან, თუ ეს იქნება სხვა ქვედანაყოფი“, აღნიშნა თავდაცვის მინისტრმა.
აშშ-მა თავისი ქვედანაყოფი ორ ქვეყანას შორის შეთანხმების შესაბამისად ესტონეთში როტაციული პრინციპით გაგზავნა.
ესტონეთის პარლამენტის ეროვნული თავდაცვის კომიტეტის თავმჯდომარემ კალევ სტოიცესკუმ აღნიშნა, რომ აშშ-მა ესტონეთი და სხვა აღმოსავლეთ ფლანგის ქვეყნები გარკვეულ გაურკვევლობაში დატოვა, მიუხედავად იმისა, რამდენ პროცენტს ხარჯავენ ქვეყნები თავდაცვაზე.
„ჩვენ შეგვიძლია აქ ვიმღეროთ, ვიცეკვოთ და ერთ ფეხზეც ვიხტუნაოთ, მაგრამ საბოლოო გადაწყვეტილებას მაინც იღებს თეთრი სახლი და ამერიკის ადმინისტრაცია, საკუთარი ინტერესებისა და ხედვის მიხედვით,“ - თქვა მან.
სტოიცესკუმ ასევე განაცხადა, რომ თუ ევროპაში სადმე უნდა დარჩეს ამერიკული ჯარები, ეს სწორედ აღმოსავლეთ ფლანგზე უნდა იყოს.
