უკრაინის პრეზიდენტმა ვოლოდიმირ ზელენსკი 5 ივლისს განაცხადა, რომ უკრაინის დაზვერვის მონაცემებით, რუსეთი უკრაინაზე მორიგ მასშტაბურ შეტევას ამზადებს.
„კვლავ გვაქვს დაზვერვის ინფორმაცია, რომ რუსები ახალ მასშტაბურ დარტყმას ამზადებენ. ეს პუტინის ხელწერაა - დარტყმა აშშ-ის დამოუკიდებლობის დღის შემდეგ და ანკარაში ნატო-ს სამიტის წინ.
რუსეთს კიდევ უფრო მეტი ბოროტების ჩადენა და ადამიანების დახოცვა სურს. გთხოვთ, გაუფრთხილდით თავს და ყურადღება მიაქციეთ საჰაერო განგაშის სიგნალებს“, - განაცხადა ზელენსკიმ.
უკრაინის პრეზიდენტმა საერთაშორისო პარტნიორებსაც მიმართა და მოუწოდა, არ დააყოვნონ საჰაერო თავდაცვისთვის საჭირო რაკეტების მიწოდება.
„ნებისმიერი დაგვიანება ჩვენი საჰაერო თავდაცვისთვის, მათ შორის Patriot-ის სისტემებისთვის განკუთვნილი რაკეტების მიწოდებაში, ადამიანების სიცოცხლის ფასად გვიჯდება და რუსეთს ომის გაგრძელებისკენ უბიძგებს“, - აღნიშნა მან.
ზელენსკის თქმით, მსოფლიოში არსებობს საჭირო რაოდენობისა და ხარისხის საჰაერო თავდაცვის საშუალებები, თუმცა მათი გამოყენებისთვის პოლიტიკური გადაწყვეტილებებია საჭირო.
„საჭიროა თქვენი გადაწყვეტილებები, რათა უკრაინაში სიცოცხლის რეალური დაცვა იყოს უზრუნველყოფილი. უპირველეს ყოვლისა, ეს ეხება ამერიკის, ასევე ევროპის და მსოფლიოს სხვა ძლიერი ქვეყნების გადაწყვეტილებებს“, - განაცხადა უკრაინის პრეზიდენტმა.
ზელენსკიმ პარტნიორებს გადაწყვეტილებების მიღებაში მეტი აქტიურობისკენ მოუწოდა და აღნიშნა, რომ „Patriot-სთვის განკუთვნილი რაკეტები ახლა საწყობებში კი არა, უკრაინაში, Patriot-ის დივიზიონებშია საჭირო“.
