აშშ-ის ვიცე-პრეზიდენტის ჯეი დი ვენსის განცხადებით, რუსეთი უკრაინის წინააღმდეგ წარმოებული ომის ფარგლებში მიმდინარე შეტევითი ოპერაციებით მნიშვნელოვან შედეგებს ვერ აღწევს, ხოლო უკრაინის მიღწევები ქმნის პირობებს ომის დასრულებისთვის.
ამის შესახებ ვენსმა The Sunday Times-თან ინტერვიუში ისაუბრა.
მისი თქმით, თანამედროვე ომში დრონებისა და სათვალთვალო ტექნოლოგიების ფართო გამოყენების პირობებში უკრაინისთვის უფრო ეფექტური იქნებოდა თავდაცვით პოზიციებზე კონცენტრირება და რუსეთის ძალების გამოფიტვა, ვიდრე მასშტაბური შეტევითი ოპერაციების განხორციელება ოკუპირებული ტერიტორიების დასაბრუნებლად.
„თუ გავიხსენებთ 2023 წლის ზაფხულს, მაშინ მთავარი საკითხი იყო, უნდა ეცადა თუ არა უკრაინას მასშტაბური კონტრშეტევა. დასავლეთის თითქმის მთელი ნაწილი, მათ შორის პრეზიდენტი ბაიდენი, უკრაინაზე ზეწოლას ახორციელებდა, რომ მათ დიდი მასშტაბის კონტრშეტევა დაეწყოთ, რაც შემდგომში სტრატეგიულ და ტაქტიკურ შეცდომად შეფასდა“, - აღნიშნა ვენსმა.
მისი თქმით, დონალდ ტრამპის ადმინისტრაციის ხედვით, უკრაინამ მოლაპარაკებების პარალელურად უნდა გააძლიეროს თავდაცვა.
„ეს მიდგომა უფრო შედეგიანი აღმოჩნდა, რადგან თავდაცვით პოზიციებზე ყოფნა უფრო მარტივია, ვიდრე შეტევაზე გადასვლა. ეს უკრაინას საშუალებას აძლევს უკეთ გამოიყენოს თავისი ტაქტიკური უპირატესობა. გულწრფელად რომ ვთქვათ, რუსეთი ახლა ისეთ მდგომარეობაშია, სადაც მისი შეტევითი მოქმედებების შედეგი მინიმალურია და ნულს უახლოვდება. ეს შეიძლება გახდეს სივრცე, რომელიც საჭიროა ამ პროცესის დასასრულებლად“, - განაცხადა ვენსმა.
მან ასევე აღნიშნა, რომ რუსეთი „ყოველ დაკავებულ კვადრატულ კილომეტრზე ძალიან მაღალ ფასს იხდის“.
მისი თქმით, ეს უკავშირდება იმას, რომ აშშ და ნატო უკრაინას თავდაცვაზე ფოკუსირებას უჭერდნენ მხარს, რაც, მისი შეფასებით, უფრო ეფექტურ მიდგომად აღმოჩნდა.
ჯეი დი ვენსი-ის განცხადებით, სწორედ ეს სტრატეგიული მიდგომა გახდა ერთ-ერთი მიზეზი, რის გამოც უკრაინამ შეძლო საბრძოლო ხაზებზე უკეთესი შედეგების მიღწევა.
