ნატო-ს სამიტის წინ თურქეთში რამდენიმე ადამიანი, მათ შორის ჟურნალისტები, მეცნიერები და მემარცხენე ორგანიზაციების წევრები დააკავეს.
ამის შესახებ სააგენტო DPA იუწყება.
რეიდები ჩატარდა ანკარაში, სტამბოლსა და კიდევ რამდენიმე პროვინციაში. რეიდები მიმართული იყო მემარცხენე და სოციალისტური პარტიების, პროფკავშირებისა და საზოგადოებრივი ორგანიზაციების წინააღმდეგ.
დაკავებულთა შორის არიან ხელისუფლების კრიტიკული გამოცემების - T24-ისა და Oda TV-ის რედაქტორები.
თურქეთის ჟურნალისტთა ასოციაციამ და პროგრესული იურისტების ასოციაციამ დაკავებულების დაუყოვნებლივი გათავისუფლება მოითხოვეს. მათი განცხადებით, ეს დაკავებები არღვევს პრესის თავისუფლებას და წარმოადგენს ოპოზიციურად განწყობილი პირების დაშინების მცდელობას ნატო-ს სამიტის წინ.
ამასთან, თურქეთის სახელმწიფო საინფორმაციო სააგენტო Anadolu იუწყება, რომ კვირას პოლიციამ რვა პროვინციაში ჩატარებული რეიდების დროს 39 ეჭვმიტანილი დააკავა.
თურქეთის ხელისუფლების ინფორმაციით, ოპერაცია მიმართული იყო აკრძალული მემარცხენე დაჯგუფების, THKP/C-DEV YOL-ის ახალგაზრდული ფრთის წინააღმდეგ.
ცალკე ოპერაციის ფარგლებში, დასავლეთ თურქეთის ქოჯაელის პროვინციაში პოლიციამ 28 ეჭვმიტანილი დააკავა. ხელისუფლების განცხადებით, ისინი დაკავშირებულნი არიან როგორც ტერორისტულ ორგანიზაცია ISIS-თან, ასევე მემარცხენე შეიარაღებულ ჯგუფებთან.
რეიდების დროს სამართალდამცავებმა ამოიღეს: საბრძოლო მასალა; აკრძალული ციფრული მასალები.
მედიის ცნობით, ეს ოპერაციები გაგრძელებაა იმ დაკავებების სერიისა, რომელიც გასულ კვირასაც განხორციელდა.
კრიტიკოსების შეფასებით, ასეთი ქმედებები მიზნად ისახავს პროტესტების თავიდან აცილებას და განსხვავებული აზრის ჩახშობას ნატო-ს სამიტის წინ. ხოლო თურქეთის ხელისუფლება ამ ყველაფერს განმარტავს როგორც ანტიტერორისტული გამოძიებების ნაწილს.
