ნიდერლანდების მთავრობამ გადაწყვიტა საკუთარ ტერიტორიაზე განათავსოს არა მხოლოდ უკრაინის წინააღმდეგ აგრესიის დანაშაულზე სპეციალური ტრიბუნალის მოსამზადებელი ეტაპები, არამედ მისი სრულფასოვანი ოპერატიული ფაზაც. ამის შესახებ უკრაინის საგარეო საქმეთა მინისტრმა ანდრიი სიბიჰამ განაცხადა. იუწყება უკრაინული მედია.
სიბიჰას თქმით, ნიდერლანდებმა მიიღო გადაწყვეტილება, საკუთარ ტერიტორიაზე უმასპინძლონ როგორც სპეციალური ტრიბუნალის მოსამზადებელ ეტაპებს (ფაზა 0 -Advance Team; ფაზა 1 - Skeleton Tribunal), ისე მის სრულფასოვან ოპერატიულ ფაზასაც (ფაზა 2 - fully-fledged operational Special Tribunal).
როგორც ცნობილია, ფაზა 1 (Skeleton Tribunal) წარმოადგენს გარდამავალ ეტაპს, რომლის დროსაც ჰააგაში იქმნება ინსტიტუტის „ჩარჩო“: შეირჩევა 15 მოსამართლე რეესტრში, დაინიშნება რეგისტრატორი, ეტაპობრივად დაკომპლექტდება ძირითადი პერსონალი, დამტკიცდება პროცედურული წესები, გაფორმდება საერთაშორისო თანამშრომლობის შეთანხმებები და შეიქმნება ადმინისტრაციული და ტექნიკური ინფრასტრუქტურა. ამ ეტაპზე ტრიბუნალი ჯერ არ ახორციელებს მართლმსაჯულებას და მხოლოდ სრულფასოვანი ამოქმედებისთვის ემზადება.
ფაზა 2 (full-fledged Tribunal) გულისხმობს სპეციალური ტრიბუნალის სრულფასოვან ფუნქციონირებას. მოსამზადებელი ეტაპების დასრულების შემდეგ ინსტიტუტი იწყებს საკუთარ იურისდიქციას: იწყება გამოძიებები, ბრალდებების წარდგენა, სასამართლო პროცესები და განაჩენების გამოტანა აგრესიის დანაშაულზე.
ამ ეტაპისთვის უნდა იყოს უკვე ჩამოყალიბებული ყველა ძირითადი ორგანო, უზრუნველყოფილი მუდმივი ინფრასტრუქტურა და უსაფრთხოების სისტემა, ასევე შექმნილი საერთაშორისო თანამშრომლობის მექანიზმები, რომლებიც აუცილებელია მართლმსაჯულების ეფექტიანი განხორციელებისთვის.
„ეს გადაწყვეტილება ბევრად სცდება ორგანიზაციულ საკითხს. ის აჩვენებს საერთაშორისო საზოგადოების მზადყოფნას, გადავიდეს თავად პასუხისმგებლობის იდეის მხარდაჭერიდან იმ ინსტიტუტის შექმნაზე, რომელიც მას პრაქტიკაში უზრუნველყოფს,“ - განაცხადა სიბიჰამ.
მისი თქმით, სპეციალური ტრიბუნალი საბოლოოდ გამოდის კონცეფციებისა და პოლიტიკური დისკუსიების სფეროდან და იძენს რეალურ ინსტიტუციურ ფორმას.
