უკრაინამ დაარტყა უფაში ნავთობგადამამუშავებელ ქარხანას, რომელიც ფრონტის ხაზიდან დაახლოებით 1300 კილომეტრში მდებარეობს, ასევე დარტყმა განხორციელდა პენზის ოლქში არსებულ სამხედრო-სამრეწველო ობიექტზე.
ამის შესახებ უკრაინის პრეზიდენტი, ვოლოდიმირ ზელენსკი წერს.
„უკვე მეორედ, რუსეთის მიერ ომის გაჭიანურების საპასუხოდ ჩვენმა „სანქციებმა“ უფაში ნავთობგადამამუშავებელ ქარხანას მიაღწია, რომელიც რუსეთში საპოხი მასალების ერთ-ერთი უდიდესი მწარმოებელია და ფრონტის ხაზიდან 1300 კილომეტრში მდებარეობს“, - წერს ზელენსკი X-ზე.
მისივე თქმით, დარტყმა ასევე განხორციელდა პენზის ოლქში რუსეთის სამხედრო-სამრეწველო კომპლექსის სტრატეგიულ ობიექტზე, რომელიც მუშაობს რაკეეტბის კომპონენტების შემუშავებასა და წარმოებაზე იმ იარაღისთვის, რომელსაც ოკუპანტები უკრაინის ქალაქებისა და დასახლებების წინააღმდეგ იყენებენ. სამიზნემდე მანძილი დაახლოებით 600 კილომეტრი იყო ფრონტის ხაზიდან.
„ყოველდღიურად სრულდება ჩვენი გეგმა უკრაინული შორი მოქმედების სანქციების გამოყენების შესახებ. ეს სრულიად სამართლიანია პასუხად ყველაფერზე, რასაც რუსეთი ჩვენს წინააღმდეგ აკეთებს. მშვიდობა საჭიროა და სწორედ ეს უნდა გააცნობიეროს რუსეთის ხელმძღვანელობამ. რუსეთმა უნდა დაასრულოს თავისი ომი. და ამისთვის ყველა შესაძლებლობა რუსეთის ხელმძღვანელობას აქვს. მადლობას ვუხდი თითოეულ უკრაინელ მეომარს, რომელიც უზრუნველყოფს ჩვენს შორი მოქმედების სიზუსტეს“, - დაწერა უკრაინის პრეზიდენტმა.
25 ივნისს ვოლოდიმირ ზელენსკიმ განაცხადა, რომ თავდაცვის ძალებმა და უკრაინის უსაფრთხოების სამსახურმა დაარტყეს ნავთობბაზას კრასნოდარის მხარეში და ორ ნავთობგადამამუშავებელ ქარხანას ბაშკირეთში, რომელიც უკრაინიდან დაახლოებით 1500 კილომეტრში მდებარეობს.
