აშშ-ის ცენტრალურმა სარდლობამ განაცხადა, რომ ორი დიდი სადესანტო ხომალდი - USS Boxer და USS Portland, რომელთა ბორტზეც საზღვაო ქვეითების მე-11 საექსპედიციო ბატალიონი იმყოფება, ახლო აღმოსავლეთის რეგიონში ჩავიდა.
CENTCOM-ის ინფორმაციით, ხომალდები ამჟამად ინდოეთის ოკეანეში იმყოფებიან. ამავე ამფიბიური სადესანტო ჯგუფის კიდევ ერთი დიდი ხომალდი - USS Comstock -აშშ-ის ცენტრალური სარდლობის პასუხისმგებლობის ზონაში მაისის დასაწყისიდან იმყოფება.
სარდლობას არ დაუკონკრეტებია, რა ამოცანები აკისრიათ რეგიონში ჩასულ ხომალდებსა და მათ ბორტზე მყოფ საზღვაო ქვეითებს.
განცხადებაში მხოლოდ აღნიშნულია, რომ ისინი „ახლო აღმოსავლეთში გეგმური მისიის ფარგლებში მოქმედებენ“.
