ნატო-ს ტერიტორიაზე უკრაინული დრონების შემთხვევითი ჩამოვარდნა ღირს რუსეთის ნავთობგადამამუშავებელი ქარხნებისა და სამხედრო ბაზების განადგურების ფასად. ამის შესახებ ესტონეთის საგარეო საქმეთა მინისტრმა, მარგუს ცაჰკნამ Financial Times-თან ინტერვიუში ისაუბრა.
ცაჰკნას განცხადებით, ესტონეთი არ არის კმაყოფილი ნატო-ს წევრი ქვეყნების ტერიტორიაზე უკრაინული უპილოტო საფრენი აპარატების ჩამოვარდნის შემთხვევებით, თუმცა კიევს რუსეთის სამხედრო ობიექტებზე თავდასხმების შეწყვეტისკენ არ მოუწოდებს.
„რა თქმა უნდა, ასეთი ინციდენტებით კმაყოფილები არ ვართ, მაგრამ უკრაინას არ ვეუბნებით, რომ ეს შეწყვიტოს. ეს ვლადიმერ პუტინის სასიცოცხლო წყაროს ურტყამს“, – განაცხადა მარგუს ცაჰკნამ.
მისივე თქმით, წელს საბრძოლო დავალების შესრულების შემდეგ უკრაინული დრონები ლიეტუვის, ლატვიის, ესტონეთისა და ფინეთის ტერიტორიაზეც ჩამოვარდა.
ცაჰკნამ ასევე „სასაცილო“ უწოდა რუსეთის ბრალდებებს, თითქოს ბალტიის ქვეყნები უკრაინულ დარტყმებს ხელს უწყობენ.
მისი განცხადებით, ბოლო ორ-ნახევარი თვის განმავლობაში ვლადიმირ პუტინის გარემოცვაში განწყობები შეიცვალა, რაც რუსეთის ინფრასტრუქტურაზე უკრაინული დარტყმების ეკონომიკურ შედეგებს უკავშირდება.
„ვიცით, რომ ბოლო ორ-ნახევარი თვის განმავლობაში პუტინის გარშემო ტონი შეიცვალა... ის უკვე აღარ არის ისეთი ოპტიმისტურად განწყობილი. ამის მთავარი მიზეზი ეკონომიკურია, ამ ღრმა დარტყმების გამო,“ - აღნიშნა მინისტრმა.
ამასთან, ცაჰკნამ გამოთქვა მოსაზრება, რომ ამ ეტაპზე ვლადიმირ პუტინი რეალური მოლაპარაკებებისთვის მზად არ არის, ხოლო ევროპის დიალოგში ჩართვის მცდელობით მხოლოდ დროის მოგებას და ევროპული ერთიანობის გახლეჩას ცდილობს.
