რუსეთის პრეზიდენტმა ვლადიმირ პუტინმა აღიარა, რომ საწვავის მიწოდებასთან დაკავშირებულმა პრობლემებმა რუსეთის რეგიონებში დეფიციტი გამოიწვია. მისი თქმით, ამ საკითხზე სამუშაო ჯგუფი მუშაობს, რათა ქვეყნის მასშტაბით საკმარისი რაოდენობის მიწოდება უზრუნველყოს.
პუტინმა ამის შესახებ საწვავის მომარაგების საკითხზე გამართულ თათბირზე ილაპარაკა.
პუტინმა, რომელიც საწვავის მიწოდებისა და განაწილების საკითხებზე მაღალჩინოსნების შეხვედრას ხელმძღვანელობდა, განაცხადა, რომ რუსეთმა უნდა შეამციროს უკრაინის მიერ ნავთობინფრასტრუქტურაზე განხორციელებული დრონებით დარტყმების გავლენა, რომლებიც ამ დეფიციტს უკავშირდება.
„როგორც იცით, პრობლემები კვლავაც რჩება როგორც მძღოლებისთვის, ისე ბიზნესისთვის. სამწუხაროდ, ბენზინგასამართ სადგურებზე რიგები ისევ არის და ყოველთვის ვერ ხერხდება საჭირო მარკის საწვავის შეძენა. რა თქმა უნდა, გვესმის ის სირთულეები, რომლებსაც ამ პერიოდში სოფლის მეურნეობის მწარმოებლები და ფერმერული მეურნეობები აწყდებიან. ყველაფერი უნდა გავაკეთოთ იმისთვის, რომ სოფლის მეურნეობის სექტორი სეზონური გეგმის შესაბამისად საწვავით სრულად იყოს უზრუნველყოფილი. მოსავლის ბედი ამაზეა დამოკიდებული”, – განაცხადა რუსეთის პრეზიდენტმა.
ცნობისათვის, უკრაინამ გააძლიერა საშუალო და შორ მანძილზე დარტყმები რუსეთისა და რუსეთის მიერ ოკუპირებულ ტერიტორიებზე არსებულ სამრეწველო ობიექტებზე, ძირითადად ნავთობის სექტორზე.
