თურქეთმა დაადასტურა მზადყოფნა, რომ შუამავლის როლი შეასრულოს უკრაინასა და რუსეთს შორის სამშვიდობო მოლაპარაკებებში. როგორც Kyiv Post წერს, ახალი მოლაპარაკებების რაუნდის ჩატარება თურქეთის საგარეო საქმეთა მინისტრმა ჰაკან ფიდანმა შესთავაზა.
მისი თქმით, ანკარა კონფლიქტის დიპლომატიური გზებით დასრულების ერთგულია და მზად არის უზრუნველყოს რუსეთისა და უკრაინის დელეგაციების შეხვედრა.
„ჩვენ ვცდილობთ რუსეთისა და უკრაინის ომის რაც შეიძლება სწრაფად დასრულებას დიალოგისა და საერთაშორისო სამართლის საფუძველზე. მზად ვართ, კვლავ შევკრიბოთ ჩვენს ქვეყანაში რუსეთისა და უკრაინის დელეგაციები მოლაპარაკებების მაგიდასთან,“ - განაცხადა ფიდანმა.
მან განაცხადა, რომ მხარეებთან წინასწარი მოლაპარაკებები უკვე გაიმართა და თურქეთმა მათ საკუთარი პოზიცია გააცნო. ახლა კი ეს პოზიცია მსოფლიო საზოგადოებისთვისაც გააჟღერა.
