ისრაელის მთავრობამ ოსმალეთის იმპერიის მიერ სომეხთა გენოციდის ოფიციალურად აღიარების გადაწყვეტილება ერთხმად მიიღო. ინფორმაციას The Times of Israel ავრცელებს.
„ისრაელი შეუერთდა 32 ქვეყანას, რომლებმაც ისტორიული სიმართლის აღიარებით მორალური ვალი შეასრულეს და უარყვეს მისი უარყოფის მცდელობები“, - დაწერა ისრაელის საგარეო საქმეთა მინისტრმა გიდეონ საარმა.
მისი თქმით, ისრაელს მორალური ვალდებულება ჰქონდა, აღნიშნული გადაწყვეტილება მიეღო
„ეს შემზარავი გენოციდი, რომელიც 100 წელზე მეტი ხნის წინ მოხდა და რომლის ფაქტებიც პრაქტიკულად სადავო აღარ არის, მოიცავდა 1.5 მილიონი ადამიანის მკვლელობას და უძველესი კულტურული მემკვიდრეობის განადგურებას. ჩემი აზრით, როგორც ებრაელებისთვის და როგორც ებრაული სახელმწიფოსთვის, ჩვენ მორალური ვალდებულება გვქონდა, რომ დღეს ეს გადაწყვეტილება მიგვეღო,“ - თქვა მან.
მისი თქმით, „ფართოდ მიიჩნევა, რომ ოსმალეთის იმპერიამ სომეხი ხალხის განადგურების მიზნით სისტემატურად ჩაიდინა ისეთი დანაშაულები, რომლებიც გენოციდს უტოლდება“.
