ამერიკელმა სამხედროებმა განაცხადეს, რომ ირანზე დამატებითი დარტყმები განახორციელეს ჰორმუზის სრუტეში ტანკერზე განხორციელებულ თავდასხმაზე საპასუხოდ.
ამის შესახებ აშშ-ის ცენტრალური სარდლობა (CENTCOM) X-ზე წერს.
„გუშინდელი აშშ-ის დარტყმების შემდეგ, რომლებიც განხორციელდა ირანის მიერ გემ Ever Lovely-ზე თავდასხმის საპასუხოდ, ირანს მიეცა შესაძლებლობა დაეცვა ცეცხლის შეწყვეტის შეთანხმება, თუმცა მან ეს არ გააკეთა, როდესაც მისმა შეიარაღებულმა ძალებმა გამოიყენეს კამიკაძე-დრონი, რომელმაც დღეს დილით 4:30-ზე (აღმოსავლეთის დროით) დაარტყა ტანკერ Kiku-ს“, - ნათქვამია CENTCOM-ის განცხადებაში.
ცნობისთვის, პანამის დროშის ქვეშ მცურავი ტანკერი ჰორმუზის სრუტის მახლობლად გადაადგილდებოდა და მასზე 2 მილიონ ბარელზე მეტი ნედლი ნავთობი იყო.
CENTCOM-ის განცხადებით, საპასუხოდ ამერიკულმა სამხედრო თვითმფრინავებმა იერიში მიიტანეს ირანის სამხედრო ინფრასტრუქტურაზე - მათ შორის სადაზვერვო სისტემებზე, საკომუნიკაციო ობიექტებზე, საჰაერო თავდაცვის სისტემებზე, დრონების საწყობებსა და დანაღმვის საშუალებებზე.
