რუსეთის მიერ დროებით ოკუპირებულ ყირიმსა და სევასტოპოლში რეგიონული მასშტაბის საგანგებო მდგომარეობა გამოცხადდა. ამის შესახებ ოკუპირებული ყირიმის რუსეთის მიერ დანიშნულმა ხელმძღვანელმა სერგეი აქსიონოვმა განაცხადა.
მისი თქმით, საგანგებო რეჟიმი 26 ივნისს, 13:00 საათიდან ამოქმედდა.
მისი განმარტებით, საგანგებო მდგომარეობის მიზანია ფინანსური, საკრედიტო, სახელშეკრულებო და სხვა პროცედურების გამარტივება, რომლებიც ზარალის ანაზღაურებასა და აღდგენით სამუშაოებს უკავშირდება.
ამასთან, მან მოსახლეობას სიმშვიდის შენარჩუნებისა და მხოლოდ სანდო ინფორმაციის წყაროების გამოყენებისკენ მოუწოდა.
რუსეთის მიერ სევასტოპოლის დანიშნულმა ხელმძღვანელმა მიხაილ რაზვოჟაევი განაცხადა, რომ ყირიმის ნახევარკუნძულის ენერგომომარაგების მდგომარეობა კვლავ რთულია.
„მიმდინარეობს სარემონტო სამუშაოები. ვიმედოვნებთ, რომ უახლოესი ერთი დღის განმავლობაში სევასტოპოლში ელექტრომომარაგება სრულად აღდგება. თუმცა, ამ დროისთვის სერგეი აქსიონოვთან შევთანხმდით, რომ ჩვენს რეგიონებში საგანგებო სიტუაციის რეჟიმი შემოგვაქვს. საგანგებო მდგომარეობა ცხადდება როგორც რესპუბლიკაში, ისე ქალაქში“, - განაცხადა რაზვოჟაევმა.
რუსეთსა და ოკუპირებულ ტერიტორიებზე საწვავის კრიზისი მწვავდება, რაც უკრაინის მიერ ნავთობგადამამუშავებელ ქარხნებზე განხორციელებული უწყვეტი დარტყმების ფონზე ვითარდება.
ვლადიმირ პუტინმა მთავრობასა და თავდაცვის სამინისტროს დაავალა, „მიიღონ ყველა აუცილებელი ზომა, რათა უკრაინის შეიარაღებული ძალების თავდასხმების შედეგები ინფრასტრუქტურისთვის ნულამდე დაიყვანონ“.
