პარლამენტის ევროინტეგრაციის კომიტეტის თავმჯდომარის ლევან მახაშვილის განცხადებით, ევროპის საბჭოს საპარლამენტო ასამბლეის (PACE) რეზოლუცია მიხეილ სააკაშვილის მეგობრების ხმაურია და მეტი არაფერი.
„კიდევ ერთხელ იგივე ქსეროასლით გადაღებული ბრალდებებია. არაფერი საინტერესო, ახალი და ისეთი საკითხი არ არის, რაზეც შეიძლება, ადამიანი დაფიქრდეს. ეს არის უხეში ბრალდებებითა და ტყუილებით გაჯერებული დოკუმენტი, ხმაური, რომელიც დაგვაბედეს, რომ წელიწადში ორჯერ-სამჯერ ეს ხმაური უნდა გაიაროს და გადაიაროს ქვეყანამ. ამით არაფერი იცვლება, ქვეყანა აგრძელებს განვითარებას – ძაღლი ყეფს, ქარავანი მიდის. საქართველო არ არის ქვეყანა, რომელიც მათთან არჩევნებზე ჩავიდა, არჩევნები კითხვის ნიშნის ქვეშ დააყენა და მათ სახელმწიფო ინსტიტუტებს არალეგიტიმური უწოდა. საქართველო მათ ოპოზიციურ პარტიებს, რადიკალიზაციის პროცესებს, „მოლოტოვის კოქტეილის“ სროლას და მათი პარლამენტების დაწვას არ აფინანსებს. რა გაჯიუტებაზეა საუბარი? ერთადერთი, რასაც საქართველოს ხელისუფლება აკეთებს, ისაა, რომ ქვეყანას ამ ტიპის ძალიან მავნე საგარეო ჩარევებისგან იცავს.
მათი ინტერესია, საგარეო ჩარევები გაგრძელდეს, რათა ძალაუფლებაში მათთვის სასურველი ხელისუფლება მოვიდეს. ამიტომ, გასაგებია, რომ საქართველოს უკან დასახევი გზა არ აქვს, რადგან საქართველო არავის უტევს და ქვეყანა იცავს თავის თავს. ამის მიუხედავად, რეალურად თუ აინტერესებთ პრობლემები და არა პრობლემებისგან გაქცევა ან თემის შეცვლა, მზად ვართ, დავსხდეთ და კონსტრუქციულად ვისაუბროთ სამართლიანობის ნიადაგზე. მზად ვართ კონსტრუქციული დიალოგისთვის, მათ შორის ადამიანებთან, რომლებიც წლების განმავლობაში იყვნენ ამ პრობლემების წყარო“, – აღნიშნა ლევან მახაშვილმა.
