აშშ-ის პრეზიდენტმა, დონალდ ტრამპმა არ გამორიცხა, რომ ანკარაში დაგეგმილი ნატო-ს სამიტის წინ, ვაშინგტონში შეიძლება მიიღონ გადაწყვეტილება თურქეთისთვის რეაქტიული ძრავების და F-35 ტიპის გამანადგურებლების მიყიდვის შესახებ.
ამის შესახებ ტრამპმა ნატო-ს გენერალურ მდივან მარკ რუტესთან ერთობლივ ბრიფინგზე, ჟურნალისტების კითხვების საპასუხოდ განაცხადა.
აღნიშნული საკითხი წლების განმავლობაში გაყინული იყო ანკარის მიერ რუსული S-400 საჰაერო თავდაცვის სისტემების შეძენის გამო.
ჟურნალისტებმა ჰკითხეს, ხომ არ წავა ტრამპი ანკარაში დაგეგმილ სამიტზე „საჩუქრით“ - დიდი ხნის ნანატრი გადაწყვეტილებით F-35-ის ძრავების ან თვითმფრინავების გაყიდვის განბლოკვის შესახებ.
„ვფიქრობ, დიახ. ნახეთ, ის ნატო-ს წევრია... შესაძლოა, რაღაც გავაკეთოთ, რაც მას ძალიან გაახარებს“, - განაცხადა აშშ-ის პრეზიდენტმა.
მანამდე მედიამ გაავრცელა ინფორმაცია, რომ ტრამპის ადმინისტრაციამ კონგრესის წინააღმდეგობის მიუხედავად, გეგმავს თურქეთისთვის 700 მილიონი დოლარის ღირებულების ათობით რეაქტიული ძრავის მიყიდვას.
ვაშინგტონსა და ანკარას შორის უთანხმოება თურქეთის მიერ რუსული S-400 სისტემების შეძენის გამო წლებია გრძელდება. ექსპერტების შეფასებით, საკითხის მოგვარება შესაძლოა გახდეს უპრეცედენტო წინსვლა თავდაცვითი თანამშრომლობის მიმართულებით ორ დიდ მოკავშირეს შორის.
