ვიდრე ანგარიშზე ვისაუბრებ, არის საკითხი, რომელიც, ჩემი აზრით, ყოველთვის უნდა ითქვას, როდესაც ევროპელი პოლიტიკოსი საქართველოზე საუბრობს: ელენე ხოშტარია და საქართველოს რეჟიმის ყველა სხვა პოლიტიკური პატიმარი დაუყოვნებლივ უნდა გათავისუფლდნენ. მათი გათავისუფლება უნდა იყოს წინაპირობა ნებისმიერი დიალოგის, თანამშრომლობისა და ნებისმიერი ევროპული ჩართულობისთვის საქართველოში, - ამის შესახებ ევროპის საბჭოს საპარლამენტო ასამბლეაზე ესტონელმა დეპუტატმა, ერიკ-ნილს კროსმა განაცხადა.
მისი თქმით, ასამბლეამ 2024 წლის ივნისის შემდეგ საქართველოს შესახებ ხუთი რეზოლუცია მიიღო, დღეს მეექვსეს განიხილავს, თუმცა საქართველოს მოწოდებები არ გაუთვალისწინებია.
„დღეს განვიხილავთ საქართველოში დემოკრატიული ინსტიტუტების ფუნქციონირებას. თუმცა ამ რეზოლუციის სათაური დემოკრატიული ინსტიტუტების უფუნქციობა უნდა იყოს. ჩვენ მოვითხოვდით, რომ გაუქმდეს კანონი „უცხოური გავლენის შესახებ“, გაიწვიონ „უცხოელი აგენტების რეგისტრაციის აქტი“, გაუქმდეს ე.წ. კანონი „ოჯახური ღირებულებების შესახებ“, ჩატარდეს ნამდვილი და დემოკრატიული საპარლამენტო არჩევნები, შეწყდეს საჯარო მოხელეებისა და სამოქალაქო საზოგადოების დაშინება, გათავისუფლდნენ პოლიტიკური პატიმრები, არ აიკრძალოს ოპოზიციური პარტიები და ბოლოს, აღდგეს სრული თანამშრომლობა ევროპის საბჭოსთან. აქედან არაფერი შესრულდა. ვითარება კიდევ უფრო გაუარესდა. საქართველო უარს ამბობს თავის ვალდებულებაზე, რომ ამ ასამლეაში დელეგაცია გამოგზავნოს. ის ითხოვს, რომ ის პირობები გავაუქმოთ, რომელიც უფლებამოსილების რატიფიცირებისთვის დავაწესეთ. რეალურად, ასამბლეის შანტაჟს ცდილობს და ჩვენ ამის უფლებას ვაძლევთ.
მოითხოვს, ჩვენ გავაუქმოთ ის პირობები, რომლებიც მისი მანდატების რატიფიცირებისთვის დავაწესეთ. არსებითად, ის ცდილობს ამ ასამბლეის შანტაჟს და ჯერჯერობით ჩვენ ამას რეალურად, ვუშვებთ. ამიტომ, როდესაც საქართველოს დემოკრატიული ინსტიტუტების ფუნქციონირებაზე ვსაუბრობთ, უნდა ვიკითხოთ, ფუნქციონირებს თუ არა თავად ევროპის საბჭოს დემოკრატიული ინსტიტუტები? “, - აღნიშნა ერიკ-ნილს კროსმა.
