სააგენტო Reuters-ის ინფორმაციით, მოსკოვის ნავთობგადამამუშავებელი ქარხანა უკრაინული დრონების შეტევების შემდეგ მუშაობას სულ მცირე ნახევარი წლის განმავლობაში ვერ განაახლებს.

ქარხანა, რომელიც მოსკოვის სამხრეთით მდებარეობს და რეგიონში საწვავის ერთ-ერთი მთავარი მიმწოდებელია, ივნისში ორჯერ გახდა დრონებით თავდასხმის სამიზნე, რის გამოც სრულად შეაჩერა მუშაობა.

ერთ-ერთი წყაროს თქმით, რემონტს „არანაკლებ ექვსი თვე“ დასჭირდება.

Reuters ასევე წერს, რომ უკრაინელების დარტყმებმა რუსეთის ნავთობგადამამუშავებელი ინფრასტრუქტურის მნიშვნელოვანი ნაწილი დააზიანა, რამაც გამოიწვია საწვავის დეფიციტი, ფასების ზრდა და გრძელ რიგები ავტოგასამართ სადგურებზე.

ცნობისათვის, 18 ივნისს უკრაინულმა დრონებმა მოსკოვის ნავთობგადამამუშავებელ ქარხანას (კაპოტნია) დაარტყეს, რის შედეგადაც საწარმოში მასშტაბური ხანძარი გაჩნდა.

რამდენიმე დღით ადრე, 16 ივნისს, იგივე ქარხანა კვლავ გახდა დრონებით თავდასხმის სამიზნე. ამ დარტყმის შედეგად დაზიანდა ნავთობის პირველადი გადამუშავების დანადგარი, რის გამოც საწარმომ დროებით მუშაობა შეაჩერა .

ქარხანა მდებარეობს მოსკოვის ცენტრიდან დაახლოებით 15 კილომეტრში და რუსეთის დედაქალაქის საწვავის ინფრასტრუქტურის ერთ-ერთ კრიტიკულ ობიექტად მიიჩნევა. ის უზრუნველყოფს მოსკოვის რეგიონის ბენზინის მოთხოვნის დაახლოებით 40%-ს,  დიზელის დაახლოებით 50%-ს, ასევე აწვდის საავიაციო საწვავს სამხედრო საჭიროებებისთვის.

ამ ფონზე, მოსკოვში უკვე შეინიშნება საწვავის დეფიციტი - ცალკეულ კერძო ავტოგასამართ სადგურებზე ბენზინისა და დიზელის ფასი ლიტრზე 10 რუბლზე მეტით გაიზარდა.