დროებით ოკუპირებული სევასტოპოლის ე.წ. გუბერნატორის, მიხაილ რაზვოჟაევის განცხადებით, 24 ივნისის ღამით ენერგეტიკულ ინფრასტრუქტურაზე განხორციელებული უპილოტო საფრენი აპარატების მასირებული შეტევის შედეგად ქალაქი სრულად ელექტრომომარაგების გარეშე დარჩა.
ადგილობრივი მცხოვრებლებისა და მონიტორინგის არხების ინფორმაციით, ღამის განმავლობაში ყირიმის სხვადასხვა რაიონში ძლიერი აფეთქებების ხმა ისმოდა. გავრცელებული ცნობებით, ერთ-ერთი მთავარი სამიზნე სევასტოპოლში მდებარე ბალაკლავის თბოელექტროსადგური იყო, რომელიც ნახევარკუნძულის ერთ-ერთ უმნიშვნელოვანეს ენერგოობიექტად მიიჩნევა.
„მტრის მიერ ჩვენს ენერგეტიკულ ინფრასტრუქტურაზე განხორციელებული თავდასხმის შედეგად ქალაქი დროებით ელექტროენერგიის გარეშე დარჩა“, - განაცხადა რაზვოჟაევმა.
მისივე თქმით, ელექტროენერგიის გათიშვა მოსახლეობის დაშინებას ვერ შეძლებს და სევასტოპოლი შექმნილ ვითარებას გაუმკლავდება.
ამ დროისთვის ზუსტდება, რა მასშტაბის დაზიანება მიიღო სევასტოპოლში მდებარე ბალაკლავის თბოელექტროსადგურმა. საოკუპაციო ადმინისტრაციის წარმომადგენლები მოქალაქეებს მობილური ტელეფონების ბატარეების დაზოგვისკენ მოუწოდებენ.
გარდა სევასტოპოლისა, აფეთქებების ხმა 24 ივნისის ღამით ყირიმის სხვა დასახლებებშიც ისმოდა, მათ შორის ბახჩისარაისა და ქერჩში.
