იტალიის საგარეო საქმეთა მინისტრი ანტონიო ტაიანი მიიჩნევს, რომ თუ ევროკავშირს რუსეთის მოლაპარაკებების მაგიდასთან დასმა სურს, რუსული გაზისა და ნავთობის შეძენაზე მკაცრი და თანმიმდევრული პოზიცია უნდა შეინარჩუნოს.
„ვფიქრობ, რუსული გაზი არ უნდა შევიძინოთ, რადგან თუ კონკრეტულ პოზიციას იკავებ, მას თანმიმდევრულად უნდა მიჰყვე. ჩვენ სწორედ ასე ვიქცევით - განვაცხადეთ, რომ რუსულ ნავთობსა და გაზს აღარ ვიყიდდით, დღეს კი ამის კარგი ალტერნატივები გვაქვს და ამ გზით ვაგრძელებთ მუშაობას“, - განაცხადა ტაიანიმ.
მისი თქმით, იტალია ასევე ავითარებს ბირთვულ ენერგეტიკას, რათა წიაღისეულ საწვავზე დამოკიდებულება შეამციროს.
ტაიანიმ ხაზგასმით აღნიშნა, რომ რუსული ნავთობისა და გაზის შესყიდვაზე უარის თქმა ერთ-ერთი მთავარი ბერკეტია, რომელიც მოსკოვს მოლაპარაკებების დაწყებას აიძულებს.
„ვფიქრობ, სწორია, თანმიმდევრულად ვიმოქმედოთ და წინ წავიწიოთ, რადგან თუ გვინდა, რომ პუტინი მოლაპარაკებების მაგიდასთან დავსვათ, მას მკაფიო სიგნალები უნდა გავუგზავნოთ. თუ ერთ საკითხში მკაცრები ვიქნებით, ხოლო მეორეში - რბილები, ის საკუთარი ინტერესების გატარებას გააგრძელებს“, - განაცხადა იტალიის საგარეო საქმეთა მინისტრმა.
