უკრაინამ შესაძლოა გადახედოს რუსეთისთვის შეთავაზებულ თავის წინადადებას დე-ფაქტო ფრონტის ხაზის გასწვრივ ცეცხლის შეწყვეტის შესახებ, რადგან მისი მოთმინება „უსაზღვრო არ არის“. ამის შესახებ გაერო-ში უკრაინის მუდმივმა წარმომადგენელმა, ანდრი მელნიკმა, გაერო-ს უშიშროების საბჭოს სხდომაზე განაცხადა.
დიპლომატმა შეახსენა, რომ უკრაინა არაერთხელ მოუწოდებდა გაერო-ს უშიშროების საბჭოს, მიეღო რეზოლუცია ცეცხლის სრული და უპირობო შეწყვეტის შესახებ.
უკრაინელმა დიპლომატმა აღნიშნა, რომ ბოლო 15 თვის განმავლობაში უკრაინა არაერთხელ მოუწოდებდა გაერო-ს უშიშროების საბჭოს, მიეღო რეზოლუცია ცეცხლის სრული და უპირობო შეწყვეტის შესახებ, თუმცა ამ ძალისხმევას სათანადო გამოხმაურება არ მოჰყოლია.
„სამწუხაროდ, უკრაინის მიერ გამოწვდილი ხელი უპასუხოდ დარჩა“, განაცხადა მელნიკმა.
მისი თქმით, კიევი კვლავ მზად არის რუსეთთან პირდაპირი მოლაპარაკებებისთვის, რათა გაერო-ს წესდების საფუძველზე სამართლიან და მდგრად მშვიდობას მიაღწიოს.
„თუმცა ჩვენი მოთმინება უსაზღვრო არ არის. უშიშროების საბჭო უნდა დაფიქრდეს, კიდევ რამდენ ხანს შეიძლება გაგრძელდეს მიდგომა - „მოვიცადოთ და ვნახოთ“. თუ ეს გაგრძელდება, არ არის გამორიცხული, უკრაინამ საკუთარი მიდგომები შეცვალოს“, - განაცხადა ანდრი მელნიკმა.
მელნიკმა ასევე აღნიშნა, რომ მოსკოვის გარშემო შექმნილი საჰაერო თავდაცვის ფარიც კი ვეღარ უზრუნველყოფს სამხედრო ობიექტების სრულ დაცვას, ხოლო რუსი პროპაგანდისტებიც უკვე აღიარებენ, რომ ვლადიმირ პუტინის მიერ დაწყებული ომის ბუმერანგი რუსეთის ტერიტორიას დაუბრუნდა.
სიტყვის დასასრულს მან პირდაპირ რუსეთის წარმომადგენელს მიმართა და ოკუპირებული უკრაინის ტერიტორიების დაუყოვნებლივ დატოვებისკენ მოუწოდა.
„თქვენ ვერასდროს შეძლებთ ოკუპირებული მიწების შენარჩუნებას. ვერასდროს. რაც შეიძლება მალე გაეცალეთ უკრაინას“, - განაცხადა ანდრი მელნიკმა.
