სახალხო დამცველი ლევან ხაბეიშვილისთვის გარე სამყაროსთან, მათ შორის, შვილებთან კომუნიკაციის უფლების შეზღუდვის საკითხის შესწავლის შედეგად, პარლამენტს საკითხის დარეგულირებისთვის წინადადებით მიმართავს.
როგორც ლევან იოსელიანმა პარლამენტში სახალხო დამცველის 2025 წლის ანგარიშის წარდგენისას განმარტა, კანონი ბრალდებულის პირადი ცხოვრების უფლების შემზღუდავი გადაწყვეტილების მიღების პროცესში, არასრულწლოვან შვილებთან ურთიერთობის საკითხზე, რაიმე სპეციალურ რეგულირებას არ აწესებს, თუმცა აუცილებელია განისაზღვროს წესი, რომელიც საგამოძიებო ორგანოს დაავალებს განიხილოს ბრალდებულისთვის დაწესებული შეზღუდვის მის არასრულწლოვან შვილზე გაუვრცელებლობის შესაძლებლობების საკითხი.
“საანგარიშო პერიოდში დავიწყეთ კიდევ ერთი მნიშვნელოვანი სისტემური პრობლემის შესწავლა, რომელიც უკავშირდება ბრალდებულთათვის გარე სამყაროსთან კომუნიკაციის უფლების შეზღუდვის პროცესში, არასრულწლოვან შვილებთან ურთიერთობის ავტომატურ და ბლანკეტურ შეზღუდვას. აღნიშნული პრობლემა გამოიკვეთა ბრალდებულ ლევან ხაბეიშვილის საქმის შესწავლის შედეგად, როდესაც აღკვეთის ღონისძიების სახით გამოყენებული პატიმრობის პერიოდში, შეეზღუდა გარე სამყაროსთან, მათ შორის, არასრულწლოვან შვილებთან კომუნიკაციის უფლება. საგულისხმოა, რომ კანონი ბრალდებულის პირადი ცხოვრების უფლების შემზღუდავი გადაწყვეტილების მიღების პროცესში, არასრულწლოვან შვილებთან ურთიერთობის საკითხზე, რაიმე სპეციალურ რეგულირებას არ აწესებს. აუცილებელია კანონით განისაზღვროს კონკრეტული წესი, რომლის თანახმადაც, საგამოძიებო ორგანოს დაევალება ბრალდებულისთვის გარე სამყაროსთან კომუნიკაციის უფლების შეზღუდვის შესახებ გადაწყვეტილების მიღებისას, ბავშვის საუკეთესო ინტერესების გათვალისწინებით, ბრალდების სპეციფიკისა და საქმის ინდივიდუალური გარემოებიდან გამომდინარე, განიხილოს ბრალდებულისთვის დაწესებული შეზღუდვის მის არასრულწლოვან შვილზე გაუვრცელებლობის შესაძლებლობების საკითხი. ამ საკითხის დარეგულირების მიზნით, საქართველოს პარლამენტს წინადადებითაც მოვმართე”, - განაცხადა იოსელიანმა.
