უკრაინის პრეზიდენტმა ვოლოდიმირ ზელენსკიმ განაცხადა, რომ უკრაინა ზრდის შორ მანძილზე მოქმედი დრონების შესაძლებლობებს. მისივე თქმით, ახალი დრონები 3000 კილომეტრზე მეტ მანძილზე შეძლებენ სამიზნეების დაზიანებას.
„ჩვენ დავიწყეთ ომის დაბრუნება რუსეთის ტერიტორიაზე. ისინი ყოველდღე გვბომბავენ და ჩვენ ყოველდღე ვუპასუხებთ. დარტყმების მასშტაბი და ინტენსივობა გაიზრდება“, - განაცხდა ზელენსკიმ უკრაინულ მედიასთან ინტერვიუში.
მისი თქმით, 20 ივნისს უკრაინულმა დრონებმა რუსეთის ტიუმენის რეგიონში მდებარე ნავთობგადამამუშავებელ ქარხანას დაარტყეს. ზელენსკის ინფორმაციით, სამიზნე უკრაინის საზღვრიდან დაახლოებით 2070 კილომეტრში მდებარეობდა, ხოლო დრონებმა დაახლოებით 2500-კილომეტრიანი მარშრუტი დაფარეს.
„ისინი 3000 კილომეტრზე მეტ მანძილზე იფრენენ. ეს ახალი, კარგი დრონებია. ჩვენ ვიცით, სად მდებარეობს მათი სამხედრო ობიექტები, ქარხნები, ნავთობბაზები და გაზის საცავები. ამიტომ გვჭირდება უფრო შორს მოქმედი იარაღი და სწორედ ამას ვქმნით“, – აღნიშნა უკრაინის პრეზიდენტმა.
ზელენსკის შეფასებით, მიმდინარე წელს უკრაინამ რუსეთისთვის „მტკივნეული დარტყმების“ მიყენება დაიწყო, რაც, მისი თქმით, „სამართლიანობის ელემენტია, რომელიც რუსეთის მიმართ მსოფლიოში ჯერ კიდევ არ არსებობს“.
