უკრაინის პრეზიდენტმა ვოლოდიმირ ზელენსკიმ განაცხადა, რომ ბელარუსის ლიდერმა ალექსანდრ ლუკაშენკამ დეესკალაციისკენ მიმართული კონკრეტული ნაბიჯები უნდა გადადგას და მხოლოდ სიტყვიერი განცხადებებით არ შემოიფარგლოს.
ზელენსკის თქმით, დაზვერვისა და სამხედრო არხების მეშვეობით ბელარუსის ხელმძღვანელობას არაერთხელ მიეწოდა გზავნილი, რომ შეეწყვიტათ რუსეთისთვის დახმარების გაწევა.
უკრაინის პრეზიდენტმა ასევე აღნიშნა, რომ ბელარუსის ტერიტორიიდან რუსული უპილოტო საფრენი აპარატების მუშაობის კოორდინაციის საკითხი ახალი არ არის და ამ პროცესს უკრაინის მხრიდან მსხვერპლი მოჰყვა.
„ლუკაშენკამ, სიტყვების გარდა, დეესკალაციაც უნდა აჩვენოს. და ეს არ უნდა იყოს უბრალოდ სიტყვები - „ბოდიშს ვიხდი“. თავისი „ბოდიში“ თავისთვის დაიტოვოს, რადგან ომის დაწყების პირველივე დღის შემდეგ ეს აღარ მუშაობს“, - განაცხადა ზელენსკიმ.
მისი თქმით, უკრაინული დაზვერვისა და უსაფრთხოების სამსახურების მეშვეობით ლუკაშენკას არაერთხელ მიეწოდა მოთხოვნა, რომ დეესკალაციისთვის კონკრეტული ნაბიჯები გადაედგა.
ზელენსკის განცხადებით, ბელარუსთან დაკავშირებით უკრაინის მთავარი მოთხოვნაა რუსეთისთვის ტექნიკური მხარდაჭერის შეწყვეტა.
„ნაბიჯი ნომერი პირველი - არანაირი ტექნიკური მხარდაჭერა. საუბარია რეტრანსლატორების პირდაპირ მხარდაჭერაზე. ისინი უნდა გათიშონ, მოხსნან და გვაჩვენონ, რომ მართლაც მოხსნილია. ამით ეს საკითხი დასრულდება. ეს გზავნილი მათ არაერთხელ გადაეცათ, ამიტომ საჯარო გაფრთხილების ეტაპი უკვე გავლილია. თუ თავად არ მოხსნიან, ჩვენ მოვხსნით. რა მოხდება ერთ კვირაში - ან ისინი გააკეთებენ ამას, ან ჩვენ“, - განაცხადა უკრაინის პრეზიდენტმა.
მისი თქმით, უკრაინა ასევე ბელარუსს მოუწოდებს, შეწყვიტოს რუსეთის არმიისთვის საწვავის მიწოდება.
„ჩვენ ასევე ვუგზავნით მათ სიგნალს - გთხოვთ, შეწყვიტოთ რუსეთის არმიისთვის საწვავის მიწოდება. თუმცა ეს მხოლოდ სიგნალია და არა მუქარა. ჩვენ უბრალოდ ვეუბნებით, რომ ამას ვხედავთ“, - აღნიშნა ზელენსკიმ.
შეგახსენებთ, 19 ივნისს ზელენსკიმ განაცხადა, რომ ალექსანდრ ლუკაშენკას ერთი კვირა აქვს იმისთვის, რომ მოხსნას რეტრანსლატორები, რომლებიც ბელარუსის ტერიტორიიდან რუსული დრონების დარტყმების კოორექტირებას ახდენენ. წინააღმდეგ შემთხვევაში, მისი თქმით, ამას უკრაინა თავად გააკეთებს.
20 ივნისს უკრაინის პრეზიდენტმა განაცხადა, რომ ასეთი ოთხი რეტრანსლატორი ბელარუსის გომელისა და ბრესტის ოლქებშია განთავსებული. მისივე თქმით, ბელარუსიდან რუსეთში ბენზინის მიწოდება ბოლო პერიოდში 13-ჯერ გაიზარდა.
