უკრაინის პრეზიდენტმა ვოლოდიმირ ზელენსკიმ განაცხადა, რომ პოლონეთის პრეზიდენტის, კაროლ ნავროცკის გადაწყვეტილება, მისთვის „თეთრი არწივის“ ორდენის ჩამორთმევის შესახებ, პოლონეთის შიდა პოლიტიკური ბრძოლის ნაწილია.
„ამაში მხოლოდ საარჩევნო პროცესს ვხედავ. პრეზიდენტი კაროლ ნავროცკი თავისი პარტიისთვის პრემიერ-მინისტრის პოსტის მოსაპოვებლად ებრძვის დონალდ ტუსკს. ჩვენ აქ არაფერ შუაში ვართ, ეს მათი შიდა საკითხია“, - თქვა ზელენსკიმ.
მისი თქმით, ნავროცკი ქვეყნის შიგნით პოლიტიკურ ბრძოლას აგრძელებს და ამ მიზნით უკრაინელების მიმართ სიძულვილის განწყობებს აღვივებს.
„ეს არის ის, რასაც ვიქტორ ორბანი აკეთებდა. ეს ცუდი ისტორიაა და ვფიქრობ, ცუდად დასრულდება“, - აღნიშნა უკრაინის პრეზიდენტმა.
ზელენსკიმ ასევე განაცხადა, რომ „სიძულვილზე პოლიტიკური დივიდენდების მიღება შეუძლებელია, რადგან საბოლოოდ ეს ხალხებს შორის ურთიერთობების გაუარესებას იწვევს“.
უკრაინის პრეზიდენტის თქმით, ნავროცკიმ მათ პირველ შეხვედრაზე მას ვოლინის ტრაგედიის შესახებ წიგნი აჩუქა.
„მასთან მივედი და ხელის ჩამორთმევისას ვოლინის ტრაგედიის შესახებ წიგნი მაჩუქა. ამაზე არ მისაუბრია, ხალხისთვის არ მომიყოლია. მშვიდად ვცხოვრობდი ამით. ახლა ამაზე ღიად ვსაუბრობ, რადგან ის ისეთ ნაბიჯებს დგამს, რომლებსაც არასწორად მივიჩნევ“, - განაცხადა უკრაინის პრეზიდენტმა.
ზელენსკიმ ასევე აღნიშნა, რომ ნავროცკის ქვეყანაში „მონარქია კი არა, დემოკრატიაა“ და ამიტომ აუცილებელია უკრაინასთან ურთიერთობების შენარჩუნება და განვითარება. მისი თქმით, ამიტომ უნდა აშენებდეს ურთიერთობებს უკრაინასთან, რომელიც დღეს ევროპას, მათ შორის პოლონეთსაც, იცავს.
