დიდი ბრიტანეთის პრემიერ-მინისტრმა კირ სტარმერმა, შესაძლოა, ორშაბათს გადადგომის შესახებ განაცხადოს.

ინფორმაციას Reuters ბრიტანულ გამოვემა Observer-ზე დაყრდნობით ავრცელებს.

გავრცელებული ინფორმაციით, სტარმერი, სავარაუდოდ, ორშაბათს გადადგება და თავისი წასვლის გრაფიკს გაასაჯაროებს. თუმცა, Reuters-ისწყარომ აღნიშნა, რომ სტარმერი კვლავ ქვეყნის მართვაზეა კონცენტრირებული და თავის მოვალეობებს ჩვეულ რეჟიმში ასრულებს.

საფრთხე, რომელიც უკვე რამდენიმე თვეა იზრდება, პარასკევს მნიშვნელოვნად გაძლიერდა, როდესაც სტარმერის მეტოქემ, ენდი ბერნემმა, პარლამენტში ადგილი მოიპოვა. ეს მას საშუალებას აძლევს ოფიციალურად წარადგინოს საკუთარი კანდიდატურა ლეიბორისტული პარტიის ლიდერის პოსტზე.

მედიის ინფორმაციით, სტარმერი გადადგომის საკითხს მეუღლესთან ერთად განიხილავს პრემიერ-მინისტრის აგარაკ რეზიდენციაში, ჩეკერსში. ამასთან, ლეიბორისტული პარტიის გავლენიანი წარმომადგენლები ელოდებიან, რომ ის ორშაბათს მკაფიო განცხადებას გააკეთებს საკუთარი პოლიტიკური მომავლის შესახებ.

გამოცემის თანახმად, თუ სტარმერი გადადგება ან თანამდებობიდან ჩამოაცილებენ, დიდი ბრიტანეთი ათწლეულზე ოდნავ მეტი პერიოდის განმავლობაში უკვე მეშვიდე პრემიერ-მინისტრს მიიღებს. ეს თითქმის ორი საუკუნის განმავლობაში მთავრობის ხელმძღვანელთა ცვლილების ყველაზე მაღალი მაჩვენებელი იქნება და ასახავს საზოგადოების უკმაყოფილებას სახელმწიფო სერვისების მდგომარეობის, ასევე ისეთი პრობლემების მიმართ, როგორიცაა არალეგალური იმიგრაცია.

Reuters-ის გათვლებით, სტარმერის პარტიიდან არჩეულმა 100-ზე მეტმა დეპუტატმა, რაც თემთა პალატაში ლეიბორისტული პარტიის წარმომადგენელთა დაახლოებით მეოთხედს შეადგენს, საჯაროდ განაცხადა, რომ სურს, კირ სტარმერი გადადგეს ან სულ მცირე საკუთარი წასვლის კონკრეტული გრაფიკი განსაზღვროს.

Observer-ის ცნობაში, რომელიც წყაროებს არ ასახელებს, ნათქვამია, რომ სტარმერი მივიდა დასკვნამდე, რომ მისი პოზიცია უკვე აღარ არის მდგრადი. ეს გადაწყვეტილება მან, გავრცელებული ინფორმაციით, მინისტრებთან, მრჩევლებთან, პარტიის მსხვილ დონორებთან და პროფკავშირების ლიდერებთან გამართული საუბრების შემდეგ მიიღო.

19 ივნისს ცნობილი გახდა მაიკერფილდის საარჩევნო ოლქში ჩატარებული შუალედური არჩევნების შედეგები — გამარჯვება მოიპოვა დიდი მანჩესტერის მერმა, ენდი ბერნემმა.

ამ გამარჯვებამ მას გზა გაუხსნა ლეიბორისტული პარტიის ლიდერის პოსტზე საკუთარი კანდიდატურის წარსადგენად და, შესაბამისად, პრემიერ-მინისტრობისთვის ბრძოლაში კირ სტარმერის მთავარ კონკურენტად ჩამოსაყალიბებლად.

ამავე დროს, კირ სტარმერმა განაცხადა, რომ სურდა ენდი ბერნემი „მნიშვნელოვან სამთავრობო თანამდებობაზე“ ეხილა, თუ იგი შუალედური არჩევნების შედეგად პარლამენტში დაბრუნდებოდა.