უკრაინის პრეზიდენტმა, ვოლოდიმირ ზელენსკიმ განაცხადა, რომ ბელარუსის გომელისა და ბრესტის ოლქებში განთავსებულია ოთხი სპეციალური რეტრანსლატორი, რომლებიც რუსეთს უკრაინის ტერიტორიაზე დრონებით თავდასხმების განხორციელებაში ეხმარება.
„უკრაინამ არაერთხელ აღნიშნა, რომ რუსეთის მცდელობამ, ბელარუსიც ჩაითრიოს ამ ომში, შესაძლოა უკიდურესად სახიფათო შედეგები გამოიწვიოს. კერძოდ, დავაფიქსირეთ, რომ ჩვენი საზღვრის გასწვრივ, ბელარუსის ტერიტორიაზე, განთავსებულია სპეციალური აღჭურვილობა, რომელიც რუსეთისთვის მუშაობს და რუსებს დრონებით დარტყმების განხორციელებაში ეხმარება“, - განაცხადა ზელენსკიმ.
მისი თქმით, უკრაინისთვის ცნობილია ოთხი ასეთი რეტრანსლატორის შესახებ, რომლებიც გომელისა და ბრესტის ოლქებში მდებარეობს. ზელენსკის განცხადებით, სწორედ ამ მოწყობილობების დახმარებით განხორციელდა შეტევები ჟიტომირის, რივნესა და ვოლინის ოლქებზე, ასევე უკრაინის ენერგეტიკულ და სარკინიგზო ინფრასტრუქტურაზე.
„ბელარუსს ჯერ კიდევ აქვს დრო, ეს აღჭურვილობა აიღოს“, - დასძინა მან.
უკრაინის პრეზიდენტის თქმით, კიევს ასევე აქვს ინფორმაცია ყველა იმ ბელარუსული საწარმოს შესახებ, რომელიც რუსეთის სამხედრო ინდუსტრიას ემსახურება,
„ჩვენ ასევე ვიცით ბელარუსში არსებული თითოეული ქარხნის შესახებ, რომელიც რუსეთისა და მისი ომისთვის მუშაობს. ყველა საწარმო, რომელიც რუსული იარაღისთვის - ჯავშანტექნიკისა და სარაკეტო სისტემებისთვის - კომპონენტებს აწვდის, ისევე როგორც საწარმოები, რომლებიც რუსეთს ომისთვის საჭირო საწვავით ამარაგებენ, ბელარუსს ამ ომში ითრევს.
უკრაინას ეს არ სურს და ჩვენ გავაფრთხილეთ ბელარუსის ფაქტობრივი ხელმძღვანელობა, რომელიც შესაბამის პროცესებზე გავლენას ახდენს“, - განაცხადა ზელენსკიმ.
ზელენსკიმ ასევე განაცხადა, რომ მიმდინარე წლის იანვარ-მაისში ბელარუსიდან რუსეთში ბენზინის მიწოდება გასული წლის ანალოგიურ პერიოდთან შედარებით 13-ჯერ გაიზარდა, ხოლო დიზელის საწვავის ექსპორტი - სამჯერ.
„სამწუხაროდ, ეს რუსეთს ზეწოლასთან ადაპტირებაში ეხმარება და მშვიდობას არ აახლოებს. პირიქით უნდა იყოს — მშვიდობა უნდა ახლოვდებოდეს, ხოლო ბელარუსმა უნდა გააკეთოს ის, რაზეც მისი ფაქტობრივი ხელმძღვანელობა არაოფიციალური არხებით საუბრობს, რათა ჩვენ, უკრაინაში, რეალურად დავინახოთ, რომ ბელარუსი ნამდვილად ეწინააღმდეგება ამ ომს. ეს ომი უნდა დასრულდეს. საჭიროა მშვიდობა“, - აღნიშნა ვოლოდიმირ ზელენსკიმ.
ზელენსკიმ ასევე განაცხადა, რომ უკრაინის წინადადება რუსეთის ლიდერ ვლადიმირ პუტინთან შეხვედრის შესახებ კვლავ ძალაში რჩება.
„მადლობელი ვარ ყველა პარტნიორის, რომლებიც უკრაინას ეხმარებიან. ამ ეტაპზე ზეწოლა ჯერ კიდევ არასაკმარისია. თუმცა ამ კვირაში ჩვენს პარტნიორებთან, მათ შორის ამერიკის შეერთებულ შტატებთან, ახალ შეთანხმებებს მივაღწიეთ, რათა ზეწოლა გაძლიერდეს და საკმარისი გახდეს. შეერთებული შტატები და ჩვენი ყველა ევროპელი პარტნიორი, ასევე „დიდი შვიდეულის“ ქვეყნები, ვითარებას ერთნაირად აფასებენ და მზად არიან, მომავალშიც განაგრძონ უკრაინის მხარდაჭერა“, - განაცხადა ზელენსკიმ.
