უკრაინის თავდაცვის ძალებმა უკრაინის საზღვრიდან დაახლოებით 2000 კილომეტრში მდებარე ტიუმენის ნავთობგადამამუშავებელ ქარხანაზე იერიში მიიტანეს. ამის შესახებ უკრაინის თავდაცვის მინისტრის მრჩეველმა, სერჰი სტერნენკომ განაცხადა.
„ადგილობრივი მცხოვრებლები სულ მცირე ორი აფეთქების შესახებ იუწყებიან. მანამდე ქალაქში დრონების საფრთხის გამო უსაფრთხოების რეჟიმი გამოცხადდა, ხოლო თავად ქარხანა სისტემაში წნევის სასწრაფო შემცირებას ახორციელებდა“, - წერს სტერნენკო.
მისი თქმით, საწარმოს საპროექტო გადამამუშავებელი სიმძლავრე წელიწადში 7,5-დან 9 მილიონ ტონამდე ნედლი ნავთობის გადამუშავებას შეადგენს.
რუსული მედიის ინფორმაციით, უპილოტო საფრენი აპარატების შეტევის შესახებ ასევე ტიუმენის ოლქის გუბერნატორმაც განაცხადა.
„ტიუმენის ნავთობგადამამუშავებელ ქარხანაზე უპილოტო საფრენი აპარატების შეტევა მოგერიებულია. ჩამოვარდნილი ნამსხვრევების ადგილზე საგანგებო სამსახურების სპეციალისტები მუშაობენ. წინასწარი ინფორმაციით, ქარხანა არ დაზიანებულა, თანამშრომლები კი ევაკუირებულნი არიან“, - დაწერა მან.
Forbes-ის ცნობით, ტიუმენის ნავთობგადამამუშავებელი ქარხანა, რუსეთის ყველაზე დიდი დამოუკიდებელი ნავთობგადამამუშავებელი საწარმო და ურალის ფედერალურ ოლქში ერთადერთი სამრეწველო ნავთობგადამამუშავებელი ქარხანაა.
ტიუმენიდან უკრაინის საზღვრამდე მანძილი დაახლოებით 2000 კილომეტრია.
